दुबईमा करिब दुई सय मुलुकको बैठकले विश्वबाट जीवाश्म इन्धनबाट टाढा जानका लागि पहिलो पटकको आह्वानमा सहमति जनाएसँगै खुशीदेखि सन्देहका प्रतिक्रियाहरू आएका छन् ।

यो सम्झौता संयुक्त राष्ट्रसङ्घको नेतृत्वको कोप२८ शिखर सम्मेलनमा भएको हो । सम्मेलनको उद्देश्य महङ्गो र विनाशकारी परिणामहरू बोक्ने जलवायु परिवर्तनसँग लड्नु हो ।

यहाँ केही प्रतिक्रिया दिइएको छ ः

‘आशावादको कारण’
“युक्रेन र मध्यपूर्वको युद्ध तथा अन्य सबै चुनौतीहरूले अस्तव्यस्त भइरहेको संसारमा यहाँ सबै खुशी हुनुपर्छ”, अमेरिकी जलवायु दूत जोन केरीले भन्नुभयो, “आशावादका कारण, कृतज्ञताका कारण र केहीका लागि कारण छ, यहाँहरू सबैलाई बधाई ।”

‘पोस्ट–जीवाश्म युग’
युरोपेली युनियन (इयु) का प्रमुख उर्सुला भोन डेर लेयेनले एउटा सामाजिक सञ्जालमा पोस्ट गर्नुभएको छ, “आजको सम्झौता पोस्ट–जीवाश्म युगको सुरुआतको प्रतीक हो ।”

‘कृतज्ञता’
अरब गुटका तर्फबाट साउदी अरबका अधिकारी अलबारा तौफिकले वार्ताका लागि ‘कृतज्ञता’ व्यक्त गर्नुभयो । विश्वको सबैभन्दा ठूलो तेल उत्पादक साउदी अरबले सम्झौता मस्यौदामा जीवाश्म इन्धनको ‘चरणबद्ध कमी’ वा ‘चरणबद्ध अन्त्य’ को उल्लेख गरिएकामा कडा विरोध जनाएको थियो ।

‘विकसित राष्ट्रहरूको दायित्व’
चीनका उपपर्यावरणमन्त्री झाओ यिङमिनले दुबईमा कोप२८ लाई भन्नुभयो, “जलवायु परिवर्तनका लागि विकसित मुलुकहरूको अटल र ऐतिहासिक दायित्व छ, त्यसैले विश्वको बाँकी हिस्साभन्दा पहिला एक दशमलव पाँच डिग्री सेल्सियसको मार्गमा अगाडि बढ्न उनीहरूले नेतृत्व गर्नुपर्छ ।”

‘नेतृत्व लिनुहोस्’
ब्राजिलका पर्यावरणमन्त्री मरिना सिल्भाले दुबईमा भन्नुभयो, “जीवाश्म इन्धनबाट टाढा जानका लागि विकसित मुलुकहरूले नेतृत्व लिन महत्त्वपूर्ण छ ।”

‘वृद्धिशील प्रगति’
साना टापु राष्ट्रहरूको गठबन्धनको अध्यक्षता गर्ने मुलुक समोआका प्रमुख वार्ताकार एनी रासमुसेनले भन्नुभयो, “हामीले सधैँ जस्तो व्यापारमा वृद्धिशील प्रगति गरेका छौँ, जबकि हामीलाई वास्तवमै हाम्रा कार्यहरूमा तीव्रताका साथ परिवर्तन गर्नुपर्ने आवश्यकता छ ।”

‘रूपान्तरण होइन’
एलायन्स अफ स्मल आइल्यान्ड स्टेट्सले एक विज्ञप्तिमा भनेको छ, “संसारलाई जीवाश्म इन्धनबाट टाढा जानका लागि सम्झौताको आह्वान ‘अगाडिको कदम’ थियो तर यो ‘वृद्धिशील र रूपान्तरणकारी’ थिएन ।”

‘गर्व गर्नुपर्छ’
दुबईमा कोप–२८ को नेतृत्व गर्ने संयुक्त अरब इमिरेट्स (युएई) का तेल प्रमुख सुल्तान अल जाबेरले भन्नुभयो, “हामीले हाम्रो ऐतिहासिक उपलब्धिमा गर्व गर्नुपर्छ र मेरो मुलुक युएईलाई यसलाई अगाडि बढाउनका लागि सहयोग गरेकामा गर्व छ ।”