पोखरा । सहकारी ठगीको आरोपमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई थप चार दिन हिरासतमा राखेर अनुसन्धान गर्न अदालतले प्रहरीलाई अनुमति दिएको छ ।

आइतबार जिल्ला अदालत कास्कीले उनलाई थप चार दिन थुनामा राखेर अनुसन्धान गर्न प्रहरीलाई अनुमति दिएको हो । योसँगै उनलाई ६ पटक म्याद थप भइसकेको छ । उनीमाथि अनुसन्धान गर्न प्रहरीले थप १३ दिनको समय मागेको थियो । तर, अदालतले चार दिन मात्र म्याद थप गरेको हो ।

सुरुमा सहकारी ठगीमा पक्राउ परेका लामिछानेविरुद्ध अहिले कीर्ते, संगठित अपराध, सम्पत्ति शुद्धीकरणसम्बन्धी कसुरमा अनुसन्धान भइरहेको छ । उनी कात्तिक २ पक्राउ परी जिल्ला प्रहरी कार्यालय कास्कीको हिरासतमा छन् ।

कास्कीबाट उनलाई अनुसन्धानका लागि बुटवल, काठमाडौं र चितवन लगिएको छ । उनीविरुद्ध पर्सामा पनि पक्राउ पुर्जी जारी भएको छ । उनलाई अब पर्सा लैजाने प्रहरीको तयारी छ ।