जापान । जापानको दक्षिणी भागमा शुक्रबार भारी वर्षा भएको छ भने अधिकारीहरूले त्यहाँका बासिन्दालाई सुरक्षित स्थानमा जान आग्रह गरेका छन् ।स्थानीयहरूले यस पहिले कहिल्यै नदेखेको ‘अत्यधिक बर्षा’ भएको बताएका छन् । जापानका विभिन्न भागमा गर्मी बढेपछि यो साता ४१ दशमलव ८ डिग्री सेल्सियस तापक्रम मापन गरिएको थियो ।

टेलिभिजन फुटेजमा कागोशिमा क्षेत्रका घरहरू डुबानमा पर्नका लागि यसको किनारमा धमिलो र तीव्र गतिमा पानी बगिरहेको देखाइएको छ।

स्थानीय सञ्चारमाध्यमका अनुसार किरिसिमा शहर कागोशिमामा २४ घण्टामा बिहान ५ बजेसम्म ५०० मिलिमिटर वर्षा भएको छ, जुन अगस्ट महिनाको औसत वर्षाभन्दा दुई गुणा बढी हो ।

जापानको मौसम विज्ञानमामिला निकाय (जेएमए) ले यस क्षेत्रमा ‘पहिले कहिल्यै अनुभव नगरिएको भारी वर्षा भइरहेको’ बताएको छ, तर भारी वर्षाको लागि उच्च सतर्कताको चेतावनीलाई कम गरिएको छ।

जेएमएका अधिकारी शुइची ताचिहाराले पत्रकार सम्मेलनमा भने, “बर्षाजन्य जोखिमको चेतावनीलाई कम गरिएको भए तापनि कृपया सतर्क रहनुहोस् र आफ्नो सुरक्षा सुनिश्चित गर्नुहोस्।”

उनले भने, “थोरै वर्षाले पनि विपद्को जोखिम बढाउन सक्छ । कृपया पहिरो र नदीमा आउने बाढीका लागि उच्च सतर्कता अपनाउनुहोस्।”
किरिशिमाका एक लाख २२ हजारभन्दा बढी बासिन्दालाई सुरक्षित स्थानमा जान आग्रह गरिएको छ भने छिमेकी मियाजाकी क्षेत्रका बासिन्दाका लागि चेतावनी हटाइएको छ ।

बर्षाका कारण यसअघि ५० लाखभन्दा बढी मानिसलाई घर छोड्न आग्रह गरिएको थियो । कागोशिमाको अर्को शहर ऐरामा पहिरो खसेपछि भत्किएको घरबाट दुई जनालाई उद्धार गरिएको स्थानीय दमकल विभागका एक अधिकारीले एएफपीलाई जानकारी दिए ।

सोही घरकी ३० वर्षीया एक महिला पनि बेपत्ता भएको जापानी अधिकारीलाई उद्धृत गरी सञ्चारमाध्यमले जनाएका छन् । कागोशिमा विमानस्थलमा आन्तरिक उडान रद्द गरिएको छ ।