काठमाडौं । अब घरजग्गा कारोबार गर्न लाइसेन्स लिनुपर्ने भएको छ । घरजग्गा कारोबारका लागि पछिल्लोपटक मालपोत नियमावलीको आठौं संशोधन गरेर इजाजत लिएर मात्रै कारोबार गर्न पाउने व्यवस्था गरिएको हो । ऐन संशोधन भएको डेढ वर्षपछि नियमावली संशोधन भएसँगै घरजग्गा कारोबारका लागि इजाजतपत्र अनिवार्य लिनुपर्ने भएको हो । यो राजपत्रमा प्रकाशनसमेत भइसकेको छ ।

यसअघि बजेट वक्तव्यमै सरकारले पटकपटक इजाजतपत्र लिएर मात्र घरजग्गा कारोबार गरिने भन्दै आएको थियो । तर ऐन र नियमावलीमा यससम्बन्धी व्यवस्था नहुँदा कार्यान्वयनमा जान सकेको थिएन । तर अब भने यो कार्यान्वयनकै चरणमा जाने भएको हो ।

सरकारले २०३६ सालमा बनेको नियमावलीलाई आठौं पटक संशोधन गर्दै घरजग्गाको व्यावसायिक कारोबार गर्ने व्यक्ति वा संस्थाले इजाजतपत्र लिनुपर्ने व्यवस्था गरेको हो । नियमावलीको परिच्छेद–६ को (ख) मा घरजग्गा कारोबारको इजाजत पत्रसम्बन्धी व्यवस्था गरिएको छ । उक्त व्यवस्थाअनुसार प्राकृतिक र कानुनी व्यक्ति वा कानुनी व्यक्तिबीच घरजग्गासम्बन्धी कारोबार गर्न इजाजतपत्र लिन निवेदन दिनुपर्नेछ ।