काठमाडौँ ।  साउदी अरबसँग श्रम सम्झौता गर्न बाटो खुलेको छ । सरकारले साउदीसँग गर्ने श्रम सम्झौताको मस्यौदा पारित गरेसँगै सम्झौता गर्ने बाटो खुलेको हो ।

मन्त्रिपरिषद् बैठकले साउदी अरबसँग श्रम सम्झौता गर्न श्रम, रोजगार तथा सामाजिक सुरक्षा मन्त्रालयलाई अनुमति दिएको छ । अब मन्त्रालयले घरेलु श्रमिकको सम्झौतालाई थाती राखेर सामान्य र सीपयुक्त श्रमिकको सीप प्रमाणीकरण कार्यक्रमसम्बन्धी सम्झौता गर्ने तयारी गरेको छ ।
मन्त्रालयले साउदीसँग चरणबद्ध रूपमा वार्ता गरी श्रम सम्झौताको मस्यौदा तयार गरी स्वीकृतिका लागि मन्त्रिपरिषद्मा पठाएको थियो ।

मस्यौदामा श्रमिकको अधिकार, न्यूनतम तलब, स्वास्थ्य सुरक्षा र रोजगारदाता परिवर्तनजस्ता विषय समेटिएका छन् । साउदीमा कार्यरत नेपाली श्रमिकले न्यूनतम पारिश्रमिक र सामाजिक सुरक्षामा समस्या भोग्दै आएका छन्, जसलाई समाधान गर्न सम्झौता महत्वपूर्ण हुने अपेक्षा गरिएको छ।

गत जेठ अन्तिम साता जेनेभामा श्रम, रोजगार तथा सामाजिक सुरक्षामन्त्री शरतसिंह भण्डारी र साउदी अरबको अन्तर्राष्ट्रिय मामिलाका उपमन्त्री तारिक अल हमदबीच घरेलु श्रमिकसँग सम्बन्धी सम्झौतालाई बाँकी राखेर सामान्य श्रम सम्झौता गर्ने सहमति भएको थियो ।