काठमाडौँ ।  राष्ट्रियसभाका सांसद पदम परियारले बैतडी जिल्लामा भएको घटनाबारे संसद्लाई जानकारी दिनुपर्ने माग गरेका छन् ।

राष्ट्रियसभाको आजको बैठकको आकस्मिक समयमा दलीय आधारमा बोल्दै नेपाली कांग्रेसका  सांसद पदमबहादुर परियारले घटना भएको लामो समयसम्म प्रहरी प्रशासनले दरखास्त नलिएको विषयमा सरकारको ध्यानाकर्षण गराएका छन् ।

उनले भने, “बैतडी जिल्लाको डिलासैनी गाउँपालिका–३ बस्ने वर्ष १३ का किरण कोलीको यही साउन १७ गते करेन्ट लागेर मृत्यु भयो, त्यसपछि कोलीकी आमा राजमतिले जिल्ला प्रहरी कार्यालय बैतडीमा घटनाबारे जाहेरी दरखास्त दिन कोसिस गरेका थिए, तर जाहेरी दरखास्त लिन मानिएन, हुलाकबाट पठाएको जाहेरीबारे प्रहरी प्रशासनले सनाखत गरेको छैन, दरखास्त दर्ता हुन सकेको छैन । प्रहरी प्रशासनले भने घटनास्थलको मुचुल्कासँग मेल नखाने किटानी जाहेरी आएपछि दर्ता नभएको जनाएको छ ।

उनले सोही ठाउँका स्थानीय बासिन्दा र राजनीतिक दलका नेताहरु पीडित परिवारलाई प्रलोभनमा पार्ने फकाउने र धम्काउने गरिएको उल्लेख गर्दै सरकारको ध्यानाकर्षण गराए । सांसद परियारले भने, “जाहेरी दर्ता गर्नुको सट्टा उल्टै स्थानीय नेताहरुले धम्काउने काम भएको छ, पीडितलाई जानकारी नै नदिइकन पीडितको खातामा अनाधिकृत रुपमा रु पाँच लाख जम्मा गर्ने काम भएको छ, घटना भएको ठाउँमा भएका सपुतहरु नष्ट गर्ने काम भएको छ, प्रहरी प्रशासनले सहयोग गरेको छैन ।”