काठमाडौं । अमेरिकाले निष्काशन गरेका १९ नेपाली काठमाडौं आइपुगेका छन् । ओम्नी एयरलायन्सको चार्टर्ड विमानबाट उनीहरू बिहीबार काठमाडौं आइपुगेका हुन् ।

गैरकानुनी रूपमा अमेरिका प्रवेश गरेका उनीहरूलाई त्यहाँको आइस प्रहरीले नियन्त्रणमा लिएको थियो । आवश्यक अनुसन्धानपछि उनीहरूलाई नेपाली दूतावाससँग समन्वय गरेर ट्राभल डकुमेन्ट बनाई नेपालतर्फ निष्काशन गरिएको हो ।

निष्काशनमा पर्नेमा १७ जना पुरुष र दुई जना महिला छन् । अमेरिकी अध्यागमनले यसअघि ३७ जना नेपालीलाई निष्काशन गरेको सूचना दिएको थियो । निष्काशनमा परेका बाँकी १८ जनालाई पनि क्रमशः नेपाल ल्याइने स्रोतले जनाएको छ । उनीहरु हातमा बोरा बोकेर फर्किएको अवस्थामा छन् ।