काठमाडौं । नेपाली सेनाले निषेधाज्ञा तथा कर्फ्यूको अवधि थप गरिएको जनाएको छ । नेपाली सेनाको जनसम्पर्क तथा सूचना निर्देशनालयले आज (बुधबार) बिहान सूचना जारी गर्दै शान्ति सुरक्षा कायम राख्ने उद्देश्यले निषेधाज्ञा तथा कर्फ्यूको अवधि थप गरिएको जानकारी गराएको हो।

बुधबार बेलुका ५ बजेसम्म देशभर निषेधाज्ञा जारी रहने र साँझ ५ बजेपछि भोलि बिहान ६ बजेसम्म कर्फ्यू आदेश जारी रहने सेनाले जारी गरेको सूचनामा उल्लेख छ ।

आन्दोलनका नाममा अराजक गतिविधि, तोडफोड, आगजनी, लुटपाट, हिंसात्मक आक्रमण तथा व्यक्तिलक्षित आपराधिक कार्यहरू भइरहेका कारण देशभर शान्ति–सुरक्षामा गम्भीर चुनौती देखिएकाले कर्फ्यू जारी गरिएको सेनाको भनाइ छ ।

कर्फ्यू तथा निषेधाज्ञाको अवधिमा एम्बुलेन्स, शव वाहन, दमकल, स्वास्थ्यकर्मी, सुरक्षाकर्मीका सवारी साधन सञ्चालन हुने र आवश्यक सहजीकरणको लागि नजिकैका सुरक्षाकर्मीहरूसँग समन्वय गर्न सकिने सेनाले जनाएको छ ।

हेर्नुस् सूचना