काठमाडौं । काठमाडौंको सुन्धारा कारागारबाट तीन हजार बढी कैदीबन्दी भागेका छन् । कारागारमा रहेका ३,८०० बढी कैदीमध्ये अहिले पाँच सय हाराहारी कैदी मात्रै कारागारमा रहेको जनाइएको छ ।

उनीहरू गए राति नै भागेको पाइएको छ । भाग्नेमा नक्कली भुटानी शरणार्थी प्रकरणमा पुर्पक्षका लागि कारागार रहेका नेकपा एमालेका निलम्बित सचिव टोपबहादुर रायमाझी पनि छन् । रायमाझीसँगै पूर्व गृहसचिव टेकनारायण पाण्डे पनि भागेका छन् ।

नक्खु कारागारबाट रवि लामिछानेसहित सबै कैदी बाहिर निस्किएको थाहा पाएपछि सुन्धारा कारागारमा पनि कैदीले आन्दोलन थालेका थिए । राति करिब ११ बजे उनीहरू गेट फोडेर भागेका हुन् । अहिले भद्रबन्दी गृहमा एक सय, केन्द्रीय बन्दीगृहमा तीन सय र महिला बन्दीगृहमा एक सय कैदीबन्दी मात्रै छन् ।

उनीहरू पनि आफै बसेका हुन् । नख्खु कारागारबाट निस्केका कैदीबन्दीहरुले राति १० बजेतिर आएर सुन्धारा तोडफोड गरेको सुरक्षा स्रोत बताउँछ । त्यसपछि सुरक्षाका लागि खटिएको नेपाल प्रहरी त्यहाँबाट भागेर आर्मी हेडक्वाटर पुगेको थियो । अनि बल्ल नेपाली सेना कारागार पुगेको थियो । त्यतिन्जेलसम्म करिब तीन हजार बढी कैदीबन्दी फरार भइसकेको बताइएको छ ।