काठमाडौं । नेकपा (माओवादी केन्द्र) का नेता तथा पूर्वमन्त्री सुदन किरातीले पुरानो राजनीतिक नेतृत्वले पद त्यागी अभिभावकको भूमिकामा जानुपर्ने सुझाव दिएका छन् । अन्यथा नयाँ पुस्ताले विद्रोह गर्न बाध्य हुने चेतावनी समेत उनले दिएका छन् ।

जेनजी आन्दोलनपछि मुलुकभर नेतृत्व पुस्ता परिवर्तनको माग तीव्र भइरहेका बेला किरातीले मंगलबार बिहान सामाजिक सञ्जालमार्फत सन्देश दिँदै अग्रज नेताहरूलाई सम्मानपूर्वक अवकाश लिन आग्रह गरेका हुन् । उनले लेखेका छन्, ‘इतिहासमा योगदान गर्नु भएका अग्रज नेताहरूले सम्मानित भइराख्न र पार्टीको साख बचाइराख्न जिम्मेवारी परित्याग गरी अभिभावकत्व ग्रहण गर्नु उचित हुनेछ ।’

यस्तै, किरातीले वर्तमान पुस्ताले विद्रोह नगरे जनताले नै उनीहरूलाई बहिष्कार गर्ने चेतावनी समेत दिएका छन् । ‘त्यसो नगरे हाम्रो पुस्ताले उहाँहरूविरुद्ध विद्रोह गर्न बाध्य हुनु पर्नेछ । नत्र जनताले हामीलाई बहिष्कार गर्नेछन् । अब के गरौँ ?’ उनले प्रश्न उठाएका छन् । किरातीको भनाइलाई जेनजी आन्दोलनपछिको राजनीतिक संक्रमणकालसँग जोडेर व्याख्या गरिएको छ, जहाँ पुरानो पुस्ताको ठाउँमा नयाँ नेतृत्वको आवश्यकता रहेको बहस चर्किएको छ ।