काठमाडौँ । नेकपा (माओवादी केन्द्र) का उपमहासचिव हरिबोल गजुरेलले पार्टी अध्यक्ष पुष्पकमल दाहाल ‘प्रचण्ड’ जनयुद्धले जन्माएका नेता भएको टिप्पणी गरेका छन् । पार्टीभित्र नेतृत्व छोड्नुपर्ने दबाब बढिरहेका बेला प्रचण्डको बचाउ गर्दै गजुरेलले सडकबाट राजीनामा माग्नु जायज नभएको बताएका छन् ।

बिहीबार उनले सामाजिक सञ्जाल फेसबुकमा लेखेका छन्, ‘प्रचण्ड जनयुद्धले जन्माएका नेता हुन् । उहाँका सीमाहरू देखिएका छन् । तर, मानसिक पीडामा रहेका नेतृत्वसँग सडकबाट तुरुन्त ‘राजीनामा’ माग्नु सही होइन ।’

गजुरेलले यस्तो कदमले इगो जन्माउन सक्ने र विधि–पद्धति तथा मानवीयताको उल्लङ्घन हुने स्पष्ट पारेका छन् । सम्मानपूर्वक भित्री छलफल र सहमतिमार्फत निर्णय लिनु नै नेतृत्वको गरिमा र पार्टीको भविष्य सुरक्षित गर्ने बलियो बाटो भएको उनले जिकिर गरेका छन् ।