जेनजी आन्दोलनको बीमा कम्पनीमा २० अर्ब ७० करोडको क्षति दाबी
Nepal One HD ३ असोज २०८२ ११:३१
काठमाडौं । जेन–जी आन्दोलनको क्रममा उत्पन्न असहज परिस्थितिका कारण विभिन्न बीमा कम्पनीहरुमा २० अर्ब ७० करोड रूपैयाँ भन्दा बढीको बीमा दाबी परेको छ।
गत भदौ २३ गतेदेखि सुरु भएको जेन–जी आन्दोलनका क्रममा देशभरको सार्वजनिक तथा निजी सम्पत्ति, सवारी साधन लगायतमा आगजनी र तोडफोडका कारण ठूलो क्षति पुगेको थियो ।
सो क्षतिमा विभिन्न बीमा कम्पनीहरुमा भदौ ३१ गतेसम्म कुल १९८४ वटा बीमा दाबी बापत कुल २० अर्ब ७० करोड ३८ लाख १४ हजार ४८२.३० रुपैयाँको प्रारम्भिक बीमा दाबी परेको हो ।
यो तथ्यांक नेपाल बीमा प्राधिकरणले बिहीबार सार्वजनिक गरेको विवरण अनुसार हो ।
सबैभन्दा बढी बीमा दाबी पर्ने कम्पनीमा द ओरियण्टल इन्स्योरेन्स रहेको छ । कम्पनीमा देशभरिबाट ४० वटा दाबी वापत कुल ५ अर्ब १४ करोड ७९ लाख रुपैयाँको प्रारम्भिक बीमा दाबी परेको छ ।
दोस्रोमा सिद्धार्थ प्रिमियर इन्स्योरेन्स रहेको छ । कम्पनीमा देशभरीबाट २५८ वटा दाबी वापत ४ अर्ब ९३ करोड २२ लाख रुपैयाँको प्रारम्भिक बीमा दाबी परेको छ ।
तेस्रोमा शिखर इन्स्योरेन्स रहेको छ । कम्पनीमा ३६६ वटा दाबी वापत कुल २ अर्ब ३९ करोड ४ लाख रुपैयाँको प्रारम्भिक बीमा दाबी परेको छ ।
त्यस्तै, आइजिआई प्रुडेन्सियल इन्स्योरेन्समा २४ वटा दाबी वापत १ अर्ब ५९ करोड ६ लाख रुपैयाँ, सगरमाथा लुम्बिनी इन्स्योरेन्समा २३३ वटा दाबी वापत १ अर्ब ४७ करोड ५५ लाख रुपैयाँ, हिमालयन एभरेष्ट इन्स्योरेन्समा १९६ वटा दाबी वापत १ अर्ब १५ करोड ६२ लाख रुपैयाँ र नेको इन्स्योरेन्समा ४० वटा दाबी वापत १ अर्ब ९ करोड ५३ लाख रुपैयाँको कुल प्रारम्भिक बीमा दावी परेको छ ।
सानिमा जिआइसी इन्स्योरेन्समा १२९ वटा दाबी वापत ७८ करोड ९३ लाख रुपैयाँ, राष्ट्रिय बीमा कम्पनीमा १७२ वटा दाबी वापत ४९ करोड ५१ लाख रुपैयाँ, युनाइटेड अजोड इन्स्योरेन्समा १७० वटा दाबी वापत ४८ करोड ५१ लाख रुपैयाँको कुल प्रारम्भिक बीमा दाबी परेको छ ।
नेपाल इन्स्योरेन्समा ७९ वटा दाबी वापत ४६ करोड ९४ लाख रुपैयाँ, एनएलजी इन्स्योरेन्समा १५१ वटा दाबी वापत ३८ करोड ५८ लाख रुपैयाँ, प्रभु इन्स्योरेन्समा ६९ वटा दाबी वापत १९ करोड १८ लाख रुपैयाँ र नेशनल इन्स्योरेन्समा १९ वटा दाबी वापत ६ करोड ८२ लाख रुपैयाँको कुल प्रारम्भिक बीमा दाबी परेको छ ।
त्यसैगरि, प्रोटेक्टिभ माइक्रो इन्स्योरेन्समा ९ वटा दाबी वापत १ करोड १३ लाख रुपैयाँ, स्टार माइक्रो इन्स्योरेन्समा ६ वटा दाबी वापत ६७ लाख रुपैयाँ, नेपाल माइक्रो इन्स्योरेन्समा १५ वटा दाबी वापत ५६ लाख रुपैयाँ र ट्रस्ट माइक्रो इन्स्योरेन्समा ८ वटा दाबी वापत ४२ लाख रुपैयाँको बीमा दाबी परेको छ ।
