काठमाडौं । नेकपा (माओवादी केन्द्र) को केन्द्रीय समिति बैठक हाल काठमाडौंमा जारी छ । बैठकमा अध्यक्ष पुष्पकमल दाहाल ‘प्रचण्ड’ ले मंसिरमा विशेष महाधिवेशन गर्ने प्रस्ताव पेस गरेका छन् । उक्त प्रस्तावले केन्द्रीय समिति भङ्ग गरी नयाँ संरचना बनाउने योजना अघि सारेको छ ।

बैठकमा प्रचण्डको प्रस्तावमा समूहगत छलफल भइरहेको छ । निर्णय अनुसार माओवादी केन्द्र विशेष महाधिवेशनमा जाने तयारीमा छ । जारी केन्द्रीय समिति वैठकमा आज (शुक्रबार) समूहगत निष्कर्ष राख्ने सुनाउने क्रम जारी छ । उपत्यका विशेष प्रदेशबाट प्रस्तुतीकरण सुरु भएको छ । यो समूहका नेता जगत सिंखडाले अध्यक्ष प्रचण्डले प्रस्तुत गरेको प्रतिवेदन सर्वम्मतिमा पास गरेको रिर्पोटिङ गरेका छन् ।

एउटा प्रदेशबाट रिर्पोटिङ गरेपछि एक जना पदाधिकारीले बोल्ने र त्यसपछि अर्को प्रदेशमा जाने र फेरि एक जना पदाधिकारीले बोल्ने गरी समय व्यवस्थापन गरिएको छ । कोशी प्रदेशबाट उपमहासचिव हरिबोल गजुरेल बोलेका छन् ।उनले वर्तमान नेतृत्वको निरन्तरता आवश्यक रहेको बताए । अहिले लुम्बिनी प्रदेशको निष्कर्ष प्रस्तुत भइराखेको छ । काठमाडौंको प्रज्ञा भवनमा बिहीबार सुरु भएको बैठकमा अध्यक्ष पुष्पकमल दाहाल ‘प्रचण्ड’, वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्माको डकुमेन्ट प्रस्तुत भएका थिए ।

प्रस्तावित विशेष महाधिवेशनमा प्रतिनिधि छनोटको लागि निम्न ११ व्यवस्था तय गरिएका छन्ः
१. पालिका र शाखाबाट प्रतिनिधि
प्रत्येक पालिका र पार्टी शाखाबाट १ जना प्रतिनिधि चयन गरिनेछ ।

२. जिल्ला र महाशाखाबाट
पार्टी सदस्य संख्या अनुसार प्रतिनिधित्व हुनेछ– १,००० सदस्य बराबर १ प्रतिनिधि ।
यसमाः
प्रत्येक ३ जनामा कम्तीमा १ महिला अनिवार्य ।
१ दलित र १ युवा प्रतिनिधि अनिवार्य ।
थप १ जना जेनजी समूहको प्रतिनिधि पनि हुनुपर्नेछ ।

३. प्रदेशस्तरबाट प्रतिनिधित्व
सात वटै भौगोलिक प्रदेशबाट २५–२५ जना प्रतिनिधि पठाइने ।

हरेक प्रदेशबाट :
७ महिला ।
२ दलित ।
१ युवा अनिवार्य ।
तीन प्रवासी प्रदेशबाट ७–७ जना, जसमा :
२ महिला ।
१ युवा अनिवार्य ।
गैर–भौगोलिक १० जना प्रतिनिधि ः
३ महिला ।
१ दलित ।
१ युवा अनिवार्य ।
४. पार्टीका विभागहरूबाट

हरेक विभागबाट २–२ जना प्रतिनिधि पठाइने ।
५. पार्टी आयोगहरूबाट
सबै आयोगहरूबाट १०–१० जना प्रतिनिधि पठाइनेछ ।
६. ज्येष्ठ र सल्लाहकार मञ्च
ज्येष्ठ कम्युनिष्ट मञ्च र केन्द्रीय सल्लाहकार परिषद्बाट १०–१० जना प्रतिनिधि रहने ।
७. केन्द्रीय कार्यालय
पार्टीको केन्द्रीय कार्यालयबाट १० जना प्रतिनिधित्व हुने ।
८. जनवर्गीय र अन्य संगठन
केन्द्रीय तहका जनवर्गीय संगठनबाटः
१ महिला अनिवार्यसहित २–२ जना ।
जातीय-क्षेत्रीय मोर्चाबाट १–१ जना ।
प्रतिष्ठान-फाउन्डेसन-समाज-सामाजिक संगठनबाट १–१ जना ।

पार्टी सहायक संगठन (थ्ऋी) बाट ५ जना ।
९. मनोनयन
केन्द्रीय सचिवालयले अधिकतम ५ प्रतिशतसम्म प्रतिनिधि मनोनयन गर्न सक्ने ।
१०. आयोजक समिति प्रतिनिधि
संयोजकसहित आयोजक समिति सदस्यहरूलाई निर्धारित प्रतिनिधि क्षेत्रबाटै निर्वाचित हुनुपर्ने ।
यदि कुनै सदस्य निर्वाचित हुन नसके, उनीहरू महाधिवेशन गतिविधिमा सहभागी हुन पाउने छन् ।
११. प्रदेशस्तरको संरचना
सबै प्रदेश समिति अब प्रदेश अधिवेशन आयोजक समितिमा रूपान्तरण हुने ।
प्रदेश अध्यक्ष संयोजकको भूमिकामा रहने छन्, पदाधिकारीहरू सचिवालयको भूमिकामा ।