काठमाडौं । ऊर्जा, जलस्रोत तथा सिंचाइ मन्त्री कुलमान घिसिङले नवमीको दिन आज (बुधबार) बीपी राजमार्गको सवारी आवतजावत व्यवस्थापन र बाढीले क्षतिग्रस्त सडक पुनर्निर्माण कार्यको समीक्षा गर्न निरीक्षणका लागि पुगेका छन् ।

निरीक्षणमा मन्त्री घिसिङसँगै सडक विभागका महानिर्देशक र सम्बन्धित आयोजनाका अधिकारीहरू पनि सहभागी भएका छन् । मन्त्री घिसिङले चाडपर्वको भीडभाडलाई मध्यनजर गर्दै यात्रुहरूलाई सहज आवतजावतको व्यवस्था गर्न अस्थायी व्यवस्थापन चुस्त बनाइराख्न तथा स्थायी पुनर्निर्माणमा छिटो काम अघि बढाउन निर्देशन दिए ।

जापान सरकारको अनुदान सहयोगमा निर्माण भएको बीपी राजमार्ग १६० किलोमिटर लामो छ जसमा गत वर्षको बाढीले ३०.५ किलोमिटर सडक भाग क्षतिग्रस्त भएको थियो । हाल इन्टरमिडियट लेनमा भइरहेको पुनर्निर्माणमा क्षतिग्रस्त खण्डलाई दुई लेनको सडकमा रूपान्तरण गरिनेछ ।

मन्त्री घिसिङले भने, ‘बाढीले क्षतिग्रस्त सडक खण्डको पुनर्निर्माणका लागि आवश्यक ठेक्का सम्झौता भइसकेको छ र जापान सरकारको सहयोगमा बाँकी सडक पुनर्निर्माणको तयारी भइरहेको छ । दशैँपछि तीव्र गतिमा काम सुरु गरिनेछ ।’ उनले आगामी भारी वर्षाको पूर्वानुमान समेत उल्लेख गर्दै सबै चालकलाई सतर्कता अपनाउन र यात्रुहरूलाई पनि हतार नगरी सुरक्षित यात्रा गर्न आग्रह गरे ।