काठमाडौं । नेकपा माओवादी केन्द्रको महाधिवेशन आयोजक समितिको सचिवालय बैठक बसिरहेको छ । पार्टी केन्द्रीय कार्यालय पेरिसडाँडामा जारी बैठक महाधिवेशन आयोजक समितिका संयोजक पुष्पकमल दाहाल ‘प्रचण्ड’ को अध्यक्षतामा बसेको हो ।

जेनजी आन्दोलनपछि दलहरुमा नेतृत्व परिवर्तनको बहस चर्किरहेको बेला प्रचण्डले पार्टी केन्द्रीय कमिटी भंग गरी आफ्नै अध्यक्षतामा महाधिवेशन आयोजक समिति गठन गरेका छन् ।

माओवादी केन्द्रले केन्द्रीय कमिटीबाटै समाजवादी मोर्चामा आबद्ध दलहरूसँग एकताको पहल गर्ने निर्णय गरेको थियो । साथै विचार मिल्ने अन्य दलहरूसँग पनि मोर्चाबन्दीको पहल गर्ने निर्णय गरेको थियो ।

‘ती विषयसँगै समसामयिक राजनीतिका अन्य विषयहरूमा बैठकमा छलफल हुन्छ,’ प्रवक्ता सापकोटाले भने । माओवादीको केन्द्रीय कमिटी बैठकले केन्द्रीय कमिटी भंग गर्दै मंसिरमा महाधिवेशन गर्ने निर्णय गरेको थियो । केन्द्रीय कमिटीलाई महाधिवेशन आयोजक कमिटीमा रूपान्तरण गरिएको छ । पुष्पकमल दाहाल ‘प्रचण्ड’ संयोजक छन् ।