काठमाडौं । प्रधानमन्त्री सुशीला कार्कीले आज (बुधबार) राजनीतिक दल र जेनजी प्रतिनिधिसँग छलफल गर्ने भएकी छिन् । प्रधानमन्त्री कार्कीले बुधबार अपराह्न ४ बजे प्रधानमन्त्री निवास बालुवाटारमा छलफल गर्न लागेको उनका प्रेस संयोजक राम रावलले जानकारी दिएका छन्।

‘निर्वाचनको वातावरण बनाउने पहल स्वरूप प्रधानमन्त्री सुशीला कार्कीले छलफल आह्वान गर्नुभएको हो,’ रावलले भने । सरकारले आगामी फागुन २१ गते प्रतिनिधि सभाको निर्वाचनको मिति तोकेको छ । प्रधानमन्त्री कार्कीले यसअघि राजनीतिक दलसँग छुट्टै छलफल गरेकी थिइन् । छलफलमा राजनीतिक दलका प्रतिनिधि, मन्त्रीहरू र जेनजी समूहका विभिन्न टोलीका प्रतिनिधि वार्तामा सहभागी हुनेछन् ।

हिजो जेनजीको एउटा समूहले प्रधानमन्त्री कार्कीलाई भेटेर विभिन्न समूहमा रहेका जेनजीलाई एउटै बनाइ दिन आग्रह गरेको थियो । जेनजी युनाइटेडका सदस्य सदीक्षा राईले समान एजेण्डा बोकेका युवाहरु एकै ठाउँमा आउनुपर्ने र प्रधानमन्त्रीले उक्त कार्यमा पहल गर्नुपर्ने बताएकी थिइन् ।