काठमाडौं । नेकपा (एकीकृत समाजवादी) का महासचिव घनश्याम भूसालले पार्टी अध्यक्ष माधवकुमार नेपाल र माओवादी केन्द्रका संयोजक पुष्पकमल दाहाल ‘प्रचण्ड’ ले नेतृत्व परित्याग गर्नुपर्ने बताएका छन् । पार्टी एकताको तयारीमा रहेका माओवादी र एकीकृत समाजवादीका शीर्ष नेताले छोडेमा मात्र एकता सार्थक हुने भुसालको भनाई छ।

एकताको विषयमा निर्णय गर्न एकीकृत समाजवादीको केन्द्रीय कमिटीको बैठक बुधबारदेखि बस्दैछ । कात्तिक १४ गतेसम्म बस्ने बैठकले औपचारिक निर्णय गरे लगत्तै माओवादीसँग एकता हुने सचिव सोमप्रसाद पाण्डेले जानकारी दिएका छन् । घनश्याम लगायतका केही नेताले प्रचण्ड र माधव नेपालको बहिर्गमन नहुने हो भने एकता प्रक्रियामा सहभागी नहुने स्पष्ट पारेका छन् । भुसालले यसका लागि एकीकृत समाजवादीका केही नेता, माओवादी केन्द्रका जनार्दन शर्मा र एमालेका केही नेतासँग छलफल पनि गरेका छन् ।

महासचिव भुसाल लगायत नेताले केन्द्रीय कमिटीको बैठकमा यसबारे कुरा उठाउँदै छन् । प्रचण्ड–नेपालको बहिर्गमनको खाका प्रस्तुत नभए एकतामा नजाने उनीहरूको योजना छ । अहिलेको समाजवादी पार्टीभित्रका तमाम समस्या र माओवादीभित्रको समस्याको समाधान नगरी गरिने एकताले समस्या झन् बढाउने र त्यसले वाम आन्दोलनलाई, आम कार्यकर्तालाई उत्साह प्रदान नगर्ने भुसालको निचोड छ । ‘आफ्नो पार्टीमा शुद्धीकरण गरेर पुनर्गठन भएपछि मात्र एकता गर्नुपर्छ,’ भूसाल निकट नेता भन्छन्, ‘आजको माओवादी र हाम्रो नेतृत्वले गर्ने एकताले कार्यकर्तालाई पनि उत्साह दिँदैन, जेन–जी आन्दोलनको भावनाको पनि सम्बोधन हुँदैन र रूपान्तरणको पनि कुरा हुँदैन भने त्यो एकतामा गइरहनुपर्छ भन्ने पक्षमा हामी छैनौं ।’

यही कुरा केन्द्रीय कमिटीमा राख्ने र त्यहाँ समझदारी नजुटे एकता प्रक्रियामा सहभागी नहुने उनले बताए । एकीकृत समाजवादीका वरिष्ठ नेता झलनाथ खनाल समेत एकताप्रति सन्तुष्ट देखिएका छैनन् । एकता प्रक्रियामा महिन्द्र यादव नेतृत्वको समूह पनि सामेल हुने तयारी छ ।एकतापछिको पार्टीमा प्रचण्ड संयोजक र नेपाल सहसंयोजक हुने कुरा लगभग निश्चित भइसकेको एकता वार्तामा रहेका नेताहरूको दाबी छ । दुई दलका नेताहरूबीच एकतापछिको पार्टीको नामबारे छलफल भइरहेको छ । माओवादी नछोड्न प्रचण्डलाई दबाब छ । उता माओवादी नाम मान्न एकीकृत समाजवादीका नेताहरू तयार छैनन् ।

एकताका विषयमा सहमति गर्न मंगलबार साँझ एकता वार्ता कमिटीको बैठक बसेको छ । यी दुई पार्टीले आगामी १६ गतेभित्र एकता गर्ने प्रयास गरिरहेका छन् । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीलाई एकतामा सामेल गर्ने प्रयास भएपनि विप्लवको पार्टी बेग्लै निर्वाचन आयोगमा दर्ता प्रक्रियामा छ । यस्तै पार्टी एकताको विपक्षमा रहेका एकीकृत समाजवादी, माओवादी, एमाले र विश्वभक्त दुलाल आहुती नेतउत्वको समूहबीच छुट्टै पार्टी बनाउने चर्चा चलेको छ ।

‘नारायणकाजी, जनार्दन, विप्लव, विश्वभक्त दुलाल आहुति, एमालेका केही नेताहरू यी सबैसँग छलफल चलेको छ, कुरा सबैले सबै ठाउँमा गरेका छन्, तर आकार लिइसकेको छैन,’ भुसालसँग निकट एक नेता भन्छन्, ‘उपयुक्त विकल्प दिनेगरी छलफल भइरहे पनि त्यो निर्णायक तहमा पुगिसकेको छैन । नारायणकाजी र जनार्दनहरू माओवादीबाट निस्किन सक्छन् कि सक्तैनन् भन्ने हो, यो निष्कर्ष निस्किसकेको छैन ।’