काठमाडौं । वामपन्थी दलहरूबीच एकताको बहस चलिरहेका बेला नेकपा (एकीकृत समाजवादी) का सम्मानित नेता झलनाथ खनालले शीर्ष नेताहरूसँगको भेटवार्ता तीव्र बनाएका छन् । नेकपा (एमाले) का अध्यक्ष केपी शर्मा ओलीसँग भेटेको भोलिपल्टै आज उनले नेकपा (माओवादी केन्द्र) का अध्यक्ष प्रचण्डसँग वार्ता गर्दैछन् ।

नेता खनालले वाम एकताका लागि चार वटा वैचारिक शर्त अघि सारेका छन् । जसमा माक्र्सवाद–लेनिनवादलाई मात्र मार्गदर्शक सिद्धान्त मान्नुपर्ने, समाजवादी क्रान्तिको कार्यदिशामा स्पष्ट हुनुपर्ने र समाजवादी कार्यक्रममा एकमत हुनुपर्ने जस्ता विषय प्रमुख छन् । ‘यी शर्तहरू मान्ने जोसुकैसँग पार्टी एकता हुनसक्छ,’ खनालले भने ।

खनाल बृहत् वाम एकताको खोजीमा रहँदा उनकै पार्टी एकीकृत समाजवादी भने विभाजनको संघारमा छ । अध्यक्ष माधवकुमार नेपाल पक्ष माओवादीसँग एकता गर्ने निर्णयमा पुगिसकेको छ भने खनाल, घनश्याम भूसाल र रामकुमारी झाँक्री पक्ष यसमा असहमत छ । झाँक्री नेतृत्वको समूह आजै पत्रकार सम्मेलन गरेर नेकपा (एमाले) फर्कने तयारीमा रहेको बुझिएको छ ।