काठमाडौं । ‘नेपाली कम्युनिष्ट पार्टी’ मा नेकपा एकीकृत समाजवादीका सम्मानित नेता तथा पूर्व प्रधानमन्त्री झलनाथ खनालले तेस्रो वरियता पाउने भएका छन् ।आज (बुधबार) बिहान माओवादी केन्द्रका अध्यक्ष पुष्पकमल दाहाल ‘प्रचण्ड’ सहित शीर्ष नेताहरूबीच खनाललाई तेस्रो वरियता दिने गरी सहमति भएको हो ।

यसअघि बामदेव गौतमलाई तेस्रो वरियतामा राखिएको थियो । विभिन्न घटकबीच हुन लागेको एकताप्रति खनालले असन्तुष्टि जनाएका थिए । तर उनी भृकुटीमण्डपमा आयोजित घोषणा सभामा सहभागी हुन पुगेका छन् । एकता वार्तामा सहभागी एक नेताका अनुसार, बुधबार बिहान मात्रै भएको छलफलमा खनाल तेस्रो वरियतामा बसेर नेपाली कम्युनिष्ट पार्टीमा सामेल हुन सहमत भएका हुन् ।

नेपाली कम्युनिष्ट पार्टीमा प्रचण्ड पहिलो, माधव कुमार नेपाल दोस्रो, झलनाथ खनाल तेस्रो, बामदेव गौतम चौथो र नारायणकाजी श्रेष्ठ पाँचौं वरियतामा रहने स्रोतले बताएको छ । खनालले हिजो मात्रै नेकपा एमालेका अध्यक्ष केपी शर्मा ओलीसँग पनि छलफल गरेका थिए । पार्टी निर्णयमा आपत्ति जनाएका खनालले सुरुमा पार्टी पुनर्गठनको प्रक्रियामा लाग्ने बताएका थिए । यद्यपि अन्तिम समयमा उनी प्रचण्ड–माधव समूहतिरै लागेका हुन् । एकता सभा हुनुअघि प्रचण्ड र माधव नेपालसँग खनाल वार्तामा बसेका थिए । महासचिव घनश्याम भुसाल पनि बिहानको वार्ता सहभागी भए पनि एकता प्रक्रियामा आउन राजी भएनन् ।