Tag: झलनाथ खनाल

काठमाडौं । लामो समयदेखि वाम दलहरूको एकताबारे शंकालु देखिँदै आएका नेकपा (एकीकृत समाजवादी) का सम्मानित नेता तथा पूर्व प्रधानमन्त्री झलनाथ खनाल अन्ततः नयाँ रूपमा बनेको संयुक्त कम्युनिष्ट पार्टीमा सहभागी भएका छन् । ‘कतिपय असहमति र रिजर्भेसन’ रहेको स्वीकार्दै उनले ‘एकताको विकल्प छैन’ भन्दै एकीकृत पार्टीमा सहमति जनाएका हुन् ।

आज (बुधबार) काठमाडौंको भृकुटीमण्डपमा आयोजित वामपन्थी एकता घोषणा सभामा सहभागी हुँदै खनालले देश अहिले ‘विषम राजनीतिक अवस्थाबाट’ गुज्रिरहेको बताउँदै समाजवादी क्रान्तिको नयाँ यात्राका लागि वाम शक्तिहरूले पुनः एकताको बाटो लिनुपर्ने धारणा राखे । उनले भने, ‘म यहाँ केही ढिलो आएँ, ढिलो आउनुको कारण केही रिजर्भेसन थिए । प्रचण्डले ती विषय मिलाउने प्रतिबद्धता जनाएपछि म सहभागी भएको हुँ । असहमति भए पनि अब वाम एकता मात्रै विकल्प हो, त्यसैमा बल पुर्‍याउन आएको हुँ ।’

खनालले समाजवादी आन्दोलनलाई सुदृढ पार्न आत्मसमालोचना आवश्यक रहेको बताउँदै सबै वाम नेताले विगतका गल्ती कमजोरी सच्याउनु पर्नेमा जोड दिए । उनका अनुसार, नयाँ पार्टीले समाजवादी क्रान्तिको झण्डा उठाउँदै समृद्ध र समानतामूलक नेपाल निर्माणमा केन्द्रित हुनुपर्छ । खनाल यसअघि एमाले अध्यक्ष केपी शर्मा ओलीसँग भेट गरी वाम पुनर्गठनबारे छलफल गरेका थिए । उनले ‘जबज त्याग्ने’ र ‘सिद्धान्तगत पुनर्विचार गर्ने’ जस्ता शर्त राखे पनि ओलीले असहमति जनाएपछि उनी वाम एकताको अर्को धार-प्रचण्ड र माधव नेपालको पक्षमा सहभागी भएका हुन् ।

यसबीच, पार्टीको वरियतामा पनि रोचक मोड आएको छ । नयाँ एकीकृत कम्युनिष्ट पार्टीमा प्रचण्डलाई पहिलो, माधवकुमार नेपाललाई दोस्रो र झलनाथ खनाललाई तेस्रो वरियता दिने सहमति भएको छ । यसअघि तेस्रो स्थानमा रहेका वामदेव गौतम अब चौंथो वरियतामा झरेका छन् । नव गठित दलमा माओवादी केन्द्र, एकीकृत समाजवादीसहित नौ वामपन्थी दलहरू सहभागी छन् । खनालको सहभागितासँगै वाम एकता प्रक्रियामा नयाँ ऊर्जा थपिएको ठानिएको छ, यद्यपि उनका ‘रिजर्भेसन’ र आगामी शक्ति सन्तुलनबारे राजनीतिक वृत्तमा बहस जारी छ । लामो समयदेखि एकता प्रक्रियाप्रति संशय राख्दै आएका झलनाथ खनाल अन्ततः वाम शिविरमा फर्किएका छन्—तर यो फिर्ती ‘पूर्ण सहमतिभन्दा बढी जिम्मेवारी र त्यागको संकेत’ का रूपमा व्याख्या भइरहेको छ ।

काठमाडौं । नेकपा (एकीकृत समाजवादी) का सम्मानित नेता झलनाथ खनालले आफू कहिले पनि पार्टी फुटोस् भन्ने चाहेको नबताउँदै वाम एकताको नयाँ अध्याय सुरु गर्नुपर्ने बताएका छन् । आज (बुधबार) काठमाडौं भृकुटीमण्डपमा आयोजित नेपाल कम्युनिष्ट पार्टीको एकता घोषणा सभालाई सम्बोधन गर्दै नेता खनालले पार्टी फुट्नुका कारणबारे खुलस्त गर्दै भने, ‘हामी वाम एकता गर्न चाहन्छौं । हामीले कहिले पनि पार्टी फुटोस् भनेर चाहेका होइनौं । तर पार्टीभित्र केही कुरा पसे, त्यसैले फुट भयो । अब ती पसेका कुरा निकालेर फ्याँक्नु पर्छ ।’

उनले कम्युनिष्ट आन्दोलनमा पटक–पटक आएको विभाजनले आन्दोलन कमजोर बनाएको बताएका छन् । ‘हामी अनेकताको पक्षमा होइनौं, एकताको पक्षमा छौ’, उनले भने, ‘कम्युनिष्ट एकतालाई कसैले जलाउन वा टुटाउन सक्दैन । अब नयाँ संकल्प गरेर अघि बढ्नु पर्छ ।’

खनालले एकता कार्यक्रममा सहभागी हुनुको कारण समेत स्पष्ट गर्दै भने, ‘मैले प्रचण्डलाई केही कुरा भनेको छु । कमरेड प्रचण्डले ती कुरा मिलाउने प्रतिबद्धता गर्नु भएको छ । त्यसैले म त्यही रिजर्भेसन राखेर यहाँ आएको हुँ–एकतालाई बल पुर्‍याउन ।’ माओवादी, नेकपा एससहितको एकीकृत पार्टी ‘नेपाली कम्युनिष्ट पार्टी’ को घोषणा सभामा खनालले माधव नेपालको नाम भने लिएनन् ।

उनले सिंगो राष्ट्रको हितका लागि पनि वाम शक्तिहरू एकजुट हुनुपर्ने औंल्याए । ‘सिंगो राष्ट्रको एकता अहिलेको आवश्यकता हो । नेपालका कम्युनिष्टहरूले राष्ट्रिय हितका लागि साझा बाटो रोज्नु पर्छ’, उनले जोड दिए । त्यस क्रममा उनले आफ्नो राजनीतिक संघर्षका सम्झना पनि गरे । जेनजी आन्दोलनका क्रममा आफ्नी श्रीमती घाइते भएको स्मरण गर्दै उनले भने, ‘हातै काट्न परे पनि मेरी श्रीमतीले कम्युनिष्ट आन्दोलनका लागि कहिल्यै झुक्न नहुने सन्देश दिनु भएको थियो । त्यही संकल्प आज पनि जीवित छ ।’ खनालको उपस्थिति र अभिव्यक्तिले वाम एकताको पहलमा नयाँ ऊर्जा थपेको आयोजकहरूको भनाइ छ । पार्टीभित्र असन्तुष्टिका आवाजबीच पनि उनले ‘पार्टी फुटोस् भन्ने चाहेको होइन, बरु फुटको कारण मेट्ने समय आएको छ’ भन्दै वाम सहकार्यका लागि स्पष्ट सन्देश दिएका छन् ।

काठमाडौं । प्रदर्शनकारीहरूले नेकपा एकीकृत समाजवादीका सम्मानीत नेता तथा पूर्व प्रधानमन्त्री झलनाथ खनालको काठमाडौँको डल्लुस्थित घरमा पनि आगो लगाएका छन् । केही बेरअघि घर बाहिर भेला भएका प्रदर्शनकारीले नाराबाजी गर्दै आगो लगाएका हुन् । अहिले घरबाट ठूलो धुँवाको मुस्लो आइरहेको देखिन्छ ।

प्रदर्शनकारीहरुले नेता र सरकारी कार्यालयहरुलाई निशाना बनाएका छन् । उनीहरुले एमाले अध्यक्ष समेत रहेका प्रधानमन्त्री केपी शर्मा ओली, कांग्रेस सभापति शेरबहादुर देउवा, एकीकृत समाजवादीका अध्यक्ष माधव नेपाल, माओवादी केन्द्रका अध्यक्ष पुष्पकमल दाहाल ‘प्रचण्ड’ को घरमा आगजनी गरेका छन् ।