सुर्खेत । नेपाली कम्युनिष्ट पार्टी (नेकपा) का नेता तथा पूर्व प्रधानमन्त्री झलनाथ खनालले देशका सबै कम्युनिष्ट शक्तिहरू एकताबद्ध हुनुपर्ने आवश्यकता औँल्याएका छन् । सुर्खेतमा आयोजित एक कार्यक्रमलाई सम्बोधन गर्दै उनले विशेषतः नेकपा एमालेका नेता तथा कार्यकर्तालाई लक्षित गर्दै एउटै कम्युनिष्ट पार्टी निर्माण गरेर अघि बढ्न आग्रह गरेका हुन् ।

वीरेन्द्रनगरमा शनिबार आयोजित पार्टीको एकता सन्देश सभामा बोल्दै खनालले मुलुकलाई समाजवादतर्फ लैजान कम्युनिष्टहरूबीचको एकता अपरिहार्य रहेको बताए । उनका अनुसार वर्गीय हित, श्रमिक र सर्वहारा वर्गको मुक्तिका लागि एउटै देशमा अनेकौं कम्युनिष्ट पार्टी रहनु उपयुक्त हुँदैन । ‘एमालेका साथीहरूका लागि पनि यही बाटो हो, अर्को विकल्प छैन’, उनले भने, ‘हामी सबै एक भएर एउटै बलियो कम्युनिस्ट पार्टी निर्माण गरौँ ।’

खनालले विगतमा विभिन्न विचार र धारहरू अपनाइए पनि अबको स्पष्ट मार्गदर्शन मार्क्सवाद–लेनिनवाद नै भएको उल्लेख गरे । उनले नेपाली विशेषताको समाजवाद नै पार्टीको मुख्य विशेषता भएको बताउँदै त्यसकै आधारमा अगाडि बढ्नुपर्ने धारणा राखे। एमालेको महाधिवेशनतर्फ संकेत गर्दै उनले त्यहाँ सहभागी नेता–कार्यकर्तालाई पनि मूल कम्युनिस्ट धारमा फर्किन आग्रह गरे ।

उनका अनुसार कम्युनिस्ट पार्टीहरू एक भएर राष्ट्रिय स्तरमै अपराजित शक्तिका रूपमा विकास हुन आवश्यक छ । टुटफुट र विभाजनको राजनीतिले लक्ष्य प्राप्त नहुने भन्दै उनले निश्चित नीति, कार्यदिशा र मापदण्डका आधारमा एकता कायम गर्नुपर्नेमा जोड दिए । सम्बोधनका क्रममा खनालले मुलुकमा विदेशी हस्तक्षेप बढ्दै गएको र यसले राष्ट्रिय स्वाधीनतामाथि प्रश्न उठाएको टिप्पणी पनि गरे । जनताको आधारभूत आवश्यकता—गाँस, बास र कपाससँगै शिक्षामा सहज पहुँच सुनिश्चित गर्ने राज्य निर्माणका लागि समाजवाद अनिवार्य रहेको उनको भनाइ थियो। समाजवादी व्यवस्थाबाट मात्रै समतामूलक र आत्मनिर्भर नेपाल निर्माण सम्भव हुने दाबी गर्दै उनले कम्युनिष्टहरूलाई साझा लक्ष्यसहित अघि बढ्न पुनः आह्वान गरे ।