काठमाडौं । डा. भीम रावल नेतृत्वको मातृभूमि जागरण अभियान नेपाली कम्युनिष्ट पार्टी (नेकपा) मा समाहित हुने निश्चित भएको छ । पर्सी (बुधबार) दिउँसो २ बजे राष्ट्रिय सभा गृहमा एकता घोषणा हुन लागेको छ । नेकपा (एमाले) को पूर्व उपाध्यक्ष समेत रहेका राउललाई भित्र्याउन पुष्पकमल दाहाल ‘प्रचण्ड’ र माधव नेपालले बुधवार राष्ट्रिय सभागृहमा ‘बृहत् पार्टी समायोजन कार्यक्रम’ आयोजना गरेका छन् ।

रावललाई नेकपामा छैटौँ वरियता दिने सहमति भएको छ । रावलले प्रचण्ड र माधव नेपालसहित आफू निकट नेताहरूसँग छलफल गरेर एकता प्रक्रियामा जान तयार भएका छन् । पहिलो वरियता प्रचण्ड, दोस्रो वरियतामा नेपाल, तेस्रोमा झलनाथ खनाल, चौथोमा वामदेव गौतम, पाँचौमा नारायणकाजी श्रेष्ठ र छैठौं वरियता रावलको रहने बताइएको छ ।

कार्यक्रममा संयोजक पुष्पकमल दाहाल प्रचण्ड, सहसंयोजक माधव नेपाल र नेता रावलले सम्बोधन गर्ने नेता प्रकाश ज्वालाले जानकारी दिएका छन् । नेकपाका संयोजक पुष्पकमल दाहाल प्रचण्ड र सहसंयोजक माधव नेपालसँग भेटेको भोलिपल्टै उनले भनेका थिए, ‘मोटामोटी सहमति भयो, तर मैले भनेर मात्र हुँदैन, साथीहरुसँग छलफल गरेर निर्णय दिन्छु ।’ त्यसयता विभिन्न चरणमा भएको छलफलपछि रावल समूह नेकपासँग एकता गर्न सहमत भएको हो ।