कैलाली । नेपाली कम्युनिष्ट पार्टीका नेता भीमबहादुर रावलले आगामी निर्वाचनलाई लक्षित गर्दै पूर्व प्रधानमन्त्री तथा एमाले अध्यक्ष केपी शर्मा ओलीमाथि कटाक्ष गरेका छन् । पार्टीको सुदूरपश्चिमस्तरीय एकता सन्देश सभालाई शुक्रबार सम्वोधन गर्दै उनले ‘जनतामा धम्की र डर फैलाउने शैली अपनाउने नेताहरूबाट सचेत हुनुपर्ने समय आएको’ बताएका हुन् ।
रावलले जेनजी आन्दोलनका बेला तात्कालीन प्रधानमन्त्री ओलीले सुरक्षा परिषद्को बैठक पनि बोलाउन नसकी बालुवाटारबाट हेलिकप्टर चढेर भागेको दाबी गर्दै अहिले भने भक्तपुरमा बसेर जनता धम्क्याइरहेको आरोप लगाए । उनले भने, ‘भक्तपुरको कुनामा बसेर जनतालाई थर्काउनेहरूलाई अब रोक्ने जिम्मा जनताकै हो, नेपाली कम्युनिस्ट पार्टी त्यसका लागि तयार छ ।’
नेता रावलले अन्तरिम सरकारलाई निशाना बनाउँदै चुनावका लागि निष्पक्ष र भयरहित वातावरण सुनिश्चित गर्न ‘बाहिर रहेका गोली–गठ्ठा’ तत्काल नियन्त्रणमा लिन आग्रह गरे । उनले जेनजी र युवाहरूको आन्दोलनका वास्तविक आवाजलाई पार्टीले राजनीतिक दस्तावेज र कार्यनीतिमा समेट्दै अघि बढ्ने प्रतिबद्धता समेत व्यक्त गरे ।
यसै क्रममा उनले आगामी प्रतिनिधिसभा निर्वाचन-फागुन २१ वा अन्य कुनै मितिमा-जो पनि तय भए, नेपाली कम्युनिष्ट पार्टी देशको ‘प्रमुख राजनीतिक शक्ति’ बन्ने विश्वास व्यक्त गरे । सुदूरपश्चिम प्रदेशका विकास चुनौती र जनसमस्यामा पार्टी जिम्मेवारीपूर्वक उभिने आश्वासन दिँदै उनले भने, ‘सिचाँइ आयोजना, नदी व्यवस्थापन, कृषि, रोजगारी-सबै क्षेत्रमा हामी दृढतापूर्वक तपाईहरूको साथमा रहनेछौं ।’ रावलले विगतमा पनि जनताले नेकपालाई ठूलो विश्वास दिएको तर सो विश्वास जोगाउने जिम्मा केपी ओलीले निर्वाह गर्न नसकेको आरोप समेत लगाए । अब उनले जनभावनालाई मूल केन्द्रमा राखेर पार्टी एकीकृत शक्ति रूपमै अघि बढ्ने बताए ।
