काठमाडौं । जनमत पार्टीका अध्यक्ष सीके राउतले सडकबाटै मधेशलाई स्वायत्त घोषणा गर्नुपर्ने भनी दिएको विवादास्पद अभिव्यक्तिलाई लिएर सोही पार्टीका कोशी प्रदेश अध्यक्षले आपत्ति जनाएका छन् । कोशी प्रदेश समन्वय समितिका अध्यक्ष बुद्धिराज न्यौपानेले राउतको उक्त धारणा पार्टीको आधिकारिक नभएको समेत बताएका छन् । देश विभाजन वा क्षेत्रीय विखण्डन पार्टीको एजेन्डा कहिल्यै नभएको उनको प्रष्टीकरण छ ।

उनले भनेका छन्, ‘अध्यक्ष ज्यूको व्यक्तिगत अभिव्यक्ति पार्टीको आधिकारिक धारणा होइन भन्ने कुरामा म स्पष्ट छु । हाम्रो पार्टी सदैव कार्यकर्ता, समर्थक तथा जनतासँग एकता, सहकार्य र साझा राष्ट्रिय हितका लागि अडिग रहनेछ ।’ अध्यक्ष राउतले देश नै विखण्डन गर्ने खालको माग राखेर संविधानलाई नै चुनौती दिएको उनको भनाइ छ । पछिल्लो समय जेन–जी आन्दोलनबाट अपदस्थ व्यक्तिहरूसँग अध्यक्ष राउतले गरेका भेटघाटहरू आन्दोलनको भावना प्रतिकूल र शंकास्पद देखिएको टिप्पणी समेत उनको छ ।

न्यौपाने भन्छन्, ‘नेपालका सबै प्रदेशहरू स्वायत्त र स्वशासित हुनुपर्छ भन्ने मान्यता सविधानमै स्थापित संघीय संरचनाको आधारभूत आदर्श हो, जसलाई जनमत पार्टीले पूर्ण समर्थन गर्दै आएको छ । अध्यक्ष राउतले प्रदेश संरचना बलियो बनाउने पहल गर्नुको साटो देश नै टुक्रयाउने अभिव्यक्ति दिएर नेपाली जनताको सिंगो मुलुक प्रतिको अगाध प्रेमलाई चुनौति दिनु भएको छ ।’ मधेश र नेपाल एकअर्काको अविभाज्य अंग रहेको भन्दै उनले आफूहरूको संघर्ष बिखण्डनका लागि नभएर समानता र सम्मानका लागि भएको बताएका छन् । राउतले केही दिनअघि स्टाटस लेख्दै सडकमै प्रदेशसभा बैठक राखेर मधेशलाई स्वायत्त घोषणा गर्ने मौका आएको बताएका थिए ।