काठमाडौं । राष्ट्रिय स्वतन्त्र पार्टी (रास्वपा) का उपसभापति स्वर्णिम वाग्लेले सहकारी प्रकरणमा बनेको संसदीय विशेष छानबिन समितिको प्रतिवेदनलाई वर्तमान सरकारले पुनः परीक्षण गर्नुपर्ने बताएका छन् । आज (मंगलबार) पार्टी सभापति रवि लामिछानेलाई नख्खु कारागारमा भेटेपछि सञ्चारकर्मीसँग कुरा गर्दै उनले अघिल्लो सरकारले ‘दुराशयसहित’ तयार पारेको प्रतिवेदनकै आधारमा लामिछानेलाई महिनौं जेलमै राखिएको आरोप दोहोर्‍याए ।

वाग्लेले भने, ‘रवि लामिछानेलाई नख्खुमै राखेको ४–५ महिना भयो । भैरहवामा जस्तै परिस्थितिमा उनी राखिनु, त्यो संसदीय छानबिन समितिको प्रतिवेदनकै परिणाम हो । त्यो प्रतिवेदन क्याबिनेटमा पुग्नुअगाडि केही घण्टामै निर्णय भयो । त्यसैले पाना नम्बर ४४९ फेरि पल्टाएर पढ्न सरकारलाई आग्रह गरेका छौँ ।’ उनका अनुसार सहकारी छानबिन समितिको प्रतिवेदनलाई क्याबिनेटबाटै पुनरावलोकन गर्ने साहस वर्तमान सरकारले देखाउनु पर्छ ।

‘कुन बिन्दुमा अनुसन्धान दोहोरिनु पर्ने हो, त्यसबारे कानुनी राय लिनुपर्छ । अदालतमा हस्तक्षेप गर्न खोजिएको होइन’, उनले स्पष्ट पारे । वाग्लेले लामिछानेसँगको भेटमा पार्टीका संगठनात्मक कार्यदेखि राष्ट्रिय राजनीति र लामिछानेको स्वास्थ्यसम्बन्धी विषयमा विस्तृत छलफल भएको बताएका छन् । उनीहरूबीचको भेट करिब सवा ११ बजेदेखि पौने २ बजेसम्म चलेको थियो । आजै विघटित प्रतिनिधिसभाका पूर्व सांसद अमरेशकुमार सिंहले पनि कारागारमै गएर सभापति लामिछानेसँग भेट गरेका छन् ।