काठमाडौं । पोखरा एभेन्जर्सले नेपाल प्रिमियर लिग (एनपीएल)को दोस्रो संस्करणको आफ्नो पहिलो खेलमा विराटनगर किंग्सविरुद्ध फिल्डिङ गर्ने भएको छ ।

मंगलबार (मंसिर २) कीर्तिपुरस्थित त्रिवि क्रिकेट रंगशालामा पोखराका कप्तान कुशल भुर्तेलले टस जितेर विराटनगरलाई ब्याटिङको निम्तो दिए ।  खेल त्रिवि क्रिकेट रंगशालामा दिउँसो ४ बजेदेखि सुरु हुनेछ ।

प्रतियोगितमा यो दुई टिमको दोस्रो भेट हो । यसअघि, पहिलो संस्करणमा यी दुई टिमले प्रतिस्पर्धा गर्दा पोखराविरुद्ध विराटनगरले सुपर ओभरमा जित निकालेको थियो ।

प्रतियोगिताको पहिलो संस्करणमा विराटनगर र पोखरा लिग चरणबाटै बाहिरिएका थिए । विराटनगरले पहिलो संस्करण पाँचौँ र पोखराले सातौँ स्थानमा रहँदै टुंग्याएको थियो ।