काठमाडौं । नेपाल शिक्षक महासंघले विगतमा केपी शर्मा ओली नेतृत्वको सरकारसँग भएको नौं बुँदे सहमति तत्काल कार्यान्वयन गर्न शिक्षामन्त्री महावीर पुनसँग आग्रह गरेको छ । मंगलबार मन्त्री पुनसँग भेट भएका महासंघका अध्यक्ष लक्ष्मीकिशोर सुवेदीले शिक्षक सरुवा निर्देशिका खारेज, स्थानीय भत्ता उपलब्ध गराउने व्यवस्था, रोकिएको तलब–भत्ता निकासा तथा गत वैशाख १७ गते मन्त्रिपरिषद्ले गरेको नौं बुँदे निर्णय तत्काल लागू गर्न माग गरिएको बताए ।

सुवेदीका अनुसार देशका केही स्थानीय तहले दलगत विवादका कारण परिषद् बैठक गर्न नसक्दा शिक्षकको तलब–भत्ता रोकिएको समस्यासम्बन्धी ध्यानाकर्षण पनि गराइयो । ‘परिषद् नहुँदा बजेट पास नभएपछि शिक्षकको तलब रोकिएको छ । आर्थिक नियमावली परिमार्जन गरेरै भए पनि नियमित तलब निकासा गर्नुपर्छ भन्ने हाम्रो माग हो’, सुवेदीले भने ।

मन्त्री पुनले उठिएका विषयमा आवश्यक सोधपुछ र अध्ययन गरेर अघि बढ्ने आश्वासन दिएको महासंघले जनाएको छ । गत चैत–वैशाखमा काठमाडौँमा भएको दीर्घकालीन आन्दोलनपछि तत्कालीन शिक्षामन्त्री रघुजी पन्तसँग शिक्षा ऐन असारभित्र जारी गर्ने लगायतका नौं बुँदे सहमति बनेको थियो, तर अझै कार्यान्वयन हुन सकेको छैन ।