काठमाडौं । ओपनर प्रियांक पन्चालको अर्धशतकप्रेरित कर्णाली याक्सले नेपाल प्रिमियर लिग (एनपीएल)मा विराटनगर किंग्सविरुद्ध १६१ रनको लक्ष्य प्रस्तुत गरेको छ ।

शुक्रबार कीर्तिपुरस्थित त्रिवि क्रिकेट रंगशालामा टस जितेर ब्याटिङमा आएको कर्णालीले निर्धारित २० ओभरमा तीन विकेट गुमाएर १६० रनको योगफल खडा गरेको हो ।  कर्णालीका ओपनर पन्चालले सर्वाधिक ६३ रन बनाए । उनले ४७ बलमा ६ चौका र दुई छक्का प्रहार गरे । प्रतियोगितामा पन्चालको यो दोस्रो अर्धशतक हो । पन्चालले यसअघि चितवन राइनोजविरुद्ध ९० रन बनाएका थिए ।

२३–१ को स्थितीबाट पन्चालले विलियम बोसिस्टोसँग ९६ रनको साझेदारी गर्दै कर्णालीको इनिङ सम्हालेका थिए । बोसिस्टो ४८ रनमा अविजित रहे । उनले ४८ बलमा दुई चौका प्रहार गरे ।

एनपीएलको दोस्रो संस्करणमा शतक बनाउने पहिलो ब्याटर बनेका मार्क वाट भने आजको खेलमा ६ रनमै पभेलियन फर्किए । गुल्सन झाले १० बलमा २०० को स्ट्राइकरेटसहित २० रन बनाए । उनले दुई चौका र एक छक्का प्रहार गरे ।

विराटनगरका मर्चेन्ट डी लिंगे र कप्तान तथा मार्की सन्दीप लामिछानेले समान एक विकेट लिए ।

कर्णालीको यो चौथो खेल हो । कर्णालीले यसअघि चितवन राइनोजसँग चार विकेटको हार बेहोरेको थियो । यस्तै, कर्णालीले लुम्बिनी लायन्सलाई नौ विकेटले पराजित गर्दा सुदूरपश्चिम रोयल्सविरुद्ध ४५ रन र चितवन राइनोजसँग चार विकेटको हार व्यहरेको छ ।

यता विराटनगरको भने पाँचौँ खेल हो । विराटनगरले यसअघि पहिलो, दोस्रो र तेस्रो खेलमा क्रमशः पोखरा एभेन्जर्सलाई ५३ रन, काठमाण्डू गोर्खाजलाई पाँच विकेट र जनकपुर बोल्ट्सलाई नौ रनले पराजित गरेको थियो । तर, चौथो खेलमा चितवन राइनोजसँग ४८ रनले पराजित भएपछि टिमको अपराजित यात्रामा ब्रेक लागेको थियो ।