काठमाडौं । नेपाली कांग्रेसभित्र महिनौंदेखि महाधिवेशन विवाद सुल्झिनुको सट्टा झनझन जटिल बन्दै गएको छ । सभापति शेरबहादुर देउवा स्वयं सक्रिय भएर नेताहरूलाई एक ठाउँमा ल्याउन खोजिरहे पनि न त सहमतिको सूत्र भेटिएको छ, न त असन्तुष्ट पक्षको अडान नै कमजोर भएको छ । उल्टै, संस्थापन र इतर पक्षबीचको दूरी झन बढेको छ । त्यसमाथि देउवा निकट नेताहरू नै दुई धारमा विभाजित हुँदा कांग्रेस नै सग्लो रहन्छ कि रहँदैन भन्ने चिन्ता बढाएको छ ।

देउवा कार्यवाहक सभापति पूर्णबहादुर खड्का, महामन्त्री गगन थापा, विश्वप्रकाश शर्मा र आफू नजिकका अन्य नेतासँग निरन्तर छलफलमा छन् । सहमति नजुटेपछि आज उनले कृष्णप्रसाद सिटौला र विमलेन्द्र निधि समेतलाई बोलाएर अर्को ‘रेस्क्यु डायलग’ प्रयास गरेका थिए । तर प्रवक्ता डा. प्रकाशशरण महतका अनुसार कुनै टुंगो लागेको छैन-बरु देउवाले विशेष महाधिवेशन अस्वीकार गरिसकेको तथ्य मात्र स्पष्ट बन्दै गएको छ । महत भन्छन्, ‘अब हुनुपर्ने नियमित महाधिवेशन हो, विशेष महाधिवेशनको सम्भावना सकियो ।’

तर यही बिन्दुमै गगन–विश्व पक्ष कतै झुक्ने पक्षमा छैन । उनीहरू कार्यतालिका होइन–‘विशेष महाधिवेशन नै’ माग्दै अडानमा उभिएका छन् । देउवाले विशेष महाधिवेशन माग आत्मसात गर्न कार्यतालिका देखाएर समय धकेल्न खोजेको आशंका उनीहरूको छ । उनीहरू ठोकुवा गर्छन्–अब नियमित महाधिवेशनको गुञ्जायश टरेको छ, एक मात्र बाटो विशेष महाधिवेशन नै हो ।

यो रस्साकस्सीबीच देउवा निकट नेताहरूमै विभाजन देखिनु कांग्रेसका लागि अर्को समस्या भएको छ । चुनावअघि महाधिवेशनमा जान नसकिने भन्ने प्रमुख पदाधिकारीहरू एक छेउ उभिए भने, पहिलेदेखि महाधिवेशन माग्दै आएका २८ केन्द्रीय सदस्य अर्को छेउ । आज त उनीहरूले बानेश्वर र कुपण्डोलमा बेग्लाबेग्लै भेला गरी आ–आफ्नै निष्कर्ष निकाले । एकले ‘चुनावअघि महाधिवेशन असम्भव’ भने, अर्कोले ‘तुरुन्त मिति घोषणा गर’ भन्दै दबाब दिए ।

यसबीच, देउवा–गगन संवाद भने रोचक मोडमा पुगेको छ । महामन्त्री गगन थापाले देउवालाई दुई विकल्प दिएका छन्-‘कि ओलीझैं मैदानमा उत्रनुस्, नत्र ‘पिसफुल एक्जिट’ लिनुस् ।’ गगनले केपी ओलीको उदाहरण दिंदै भने, ‘ओली फ्रन्टमा उत्रे, महाधिवेशनमा पार्टीलाई लगे, अध्यक्षमा नै प्रतिस्पर्धा गर्दैछन् । तपाईंले त्यो मौका गुमाउनु भयो । अझै पनि मैदानमा आउन सक्नु हुन्छ-हामी प्रतिस्पर्धा गर्छौं ।’

उनले पर्दा पछाडि बसेर निर्णय रोकेकाले पार्टीलाई झनै जटिल बनाएको आरोप पनि लगाए । संवादमा गगनले ‘बटमलाइन’ प्रष्ट राखे-‘पुस २७ मा नियमित महाधिवेशन, नभए पुस २८ मा विशेष महाधिवेशन ।’ संस्थापन पक्षले भने विशेष महाधिवेशन नगर्ने आधारमा धेरै विकल्प राखे, तर गगन–विश्व पक्ष लचक नहुने पक्षमा देखिएका छन् ।