काठमाडौं । नेपाल एसीसी पुरुष यु–१९ प्रिमियर कपको फाइनलमा पुगेको छ । आज (शनिबार) दिउँसो भएको सेमिफाइनल खेलमा मलेसियामाथि ९ विकेटको सहज जित निकाल्दै नेपाल फाइनलमा पुगेको हो ।

जितको लागि ५२ रनको झिनो विजयी लक्ष्य पाएको नेपालले ७.५ ओभरमा एक विकेटको क्षतिमा ५५ रन बनाउँदै लक्ष्य भेट्टाएको हो । नेपालको लागि भान्श क्षेत्रीले नटआउट २३ र निश्चल क्षेत्रीले नटआउट १५ रन बनाउँदा निरजकुमार यादवले ४ रनको योगदान गरे । मलेसियाका मुहम्मद आक्रमले एक विकेट लिए ।

यसअघि अजमानस्थित सेभेन डिस्ट्रिक्स मैदान २ मा भएको खेलमा टस हारेर पहिले ब्याटिङमा उत्रिएको मलेसिया १७.२ ओभरमा अलआउट हुँदै ५१ रनमा समेटिएको थियो । मलेसियाको लागि नवौं र दसौं नम्बरमा ब्याटिङ गर्न आएका मुहम्मद फथुल मुइनले ११ र हाम्जाह पंगीले १३ रन बनाउँदा अन्य ब्याट्सम्यानले दोहोरो अंक छुन सकेनन् ।

नेपालको लागि नितेशकुमार पटेलले ८ ओभरमा २४ रन दिएर चार विकेट लिँदा चन्दन रामले तीन तथा अप्रजित पौडेल, अशोक धामी र रोशन विश्वकर्माले समान एक-एक विकेट हात पारे । अब नेपालले फाइनल खेलमा आज ओमान र युएईबीच जारी पहिलो सेमिफाइनल खेलको विजेतासँग उपाधिको लागि प्रतिस्पर्धा गर्नेछ ।