काठमाडौं । नेपाली कम्युनिष्ट पार्टी (नेकपा) ले आज (सोमबार) कोशी प्रदेशस्तरीय सन्देश सभा गर्दैछ । प्रदेशको राजधानी विराटनगरमा आयोजना हुने विशेष सभालाई सम्बोधन गर्न पार्टीका शीर्ष नेताहरू आज विराटनगर आउन लागेका हुन् ।

एकताको सन्देश तल्लो तहसम्म पुर्‍याउन सातै प्रदेशमा सभा गर्ने क्रममा आज कोशी प्रदेशको विराटनगरमा सभा गर्न लागिएको हो ।जनआन्दोलन चोकको उत्तरतर्फ रहेको पुरानो गुद्रीको खुल्ला मैदानमा दिउँसो १२ बजेदेखि सभा आयोजना हुने नेकपाका स्थानीय नेताहरुले बताएका छन् ।

१० हजार समर्थकलाई उपस्थित गराउने दाबी उनीहरुले गरेका छन् । सुदूरपश्चिम, लुम्बिनी गण्डकी प्रदेशमा भने नेकपाले सभा सकेको छ । सभामा प्रमुख वक्ताका रूपमा नेकपाका संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपाल, नेता भीम रावललगायत नेताहरू रहेका छन् ।