काठमाडौं । नव गठित नेपाली कम्युनिष्ट पार्टीका सहसंयोजक माधवकुमार नेपालले नेपालमा दल र नेताहरूको उपादेयता अझै नसकेको बताएका छन् । काठमाडौंको भृकुीमण्डपमा आयोजित एकतामा सभामा सम्बोधन गर्दै उनले नेताहरूले आफ्नो गल्ती, कमजोरी भने सच्याउनु पर्ने बताए ।
‘नेपालमा कम्युनिष्ट पार्टी र नेताहरूको उपादेयता अझै सकेको छैन । नपालको राजनीतिमा सबैभन्दा ठूलो रोग भ्रष्टाचार र कुशासन भएको छ । आत्मकेन्द्रित चिन्तन ठूलो रोग भएको छ । इमानदारिताको अभाव छ । हामीले आफ्नो आचरण र व्यवहारबाट जनताको विश्वास जित्न सक्नु पर्छ । युवापस्ताको विश्वास जित्नुपर्छ,’ उनले भने । उनले वामदेव गौतमको कुरा स्मरण गर्दै थपे, ‘कुराले चिउरा भिज्नेवाला छैन । हामी कुरा गर्न र प्रचवन दिन सिपालु छौं । तर, रुपान्तरण गर्ने कुरामा धेरै पछाडि छौं ।’
पूर्व प्रधानमन्त्री समेत रहेका उनले नेपाल मात्र त्यस्तो देश रहेको, जहाँ कम्युनिष्टहरूले झण्डै दुई तिहाइ बहुमत प्राप्त गरेको बताए । ‘बृहत् वाम एकता निकै लोकप्रिय छ । तर, व्यवहार हे¥यो भने अब धेरै बाँकी देख्नु हुन्छ । बाँकी वामहरूसँग पनि एकताको प्रयास अवश्य गर्नेछौं । हामी सानो दायरामा बस्न चाहँदैनौं । बन्देज, आग्रह र पूर्वग्राह पनि राख्दैनौं । सबैलाई समेट्नेगरी गोलबद्ध गरेर हिंड्न चाहन्छौं,’ उनले भने ।
नेपालले भारत र चीनमा कम्युनिष्ट पार्टीको नाम नियाल्दै आफूहरूले नव गठित पार्टीको नाम घोषणा गरेको सुनाए । नेपालले पार्टीको नाम राख्न वृहत छलफल भएको पनि बताए । ‘यो नेपाली कम्युनिष्ट पार्टी, हामीले सोचेका थियौं, पार्टीको नाम के राख्ने ? नेकपा समाजवादी राख्ने कि हाम्रो राजु कार्की कमरेडको । सबै समाजवादी कुन समाजवादी कुन समाजवादी ? अनि नेपाली कम्युनिष्ट राख्ने कि ?,’ नेपालले भने, ‘चिनियाँ कम्युनिष्ट पार्टी भन्छन्, भारतीय कम्युनिष्ट पार्टी भन्छन् । भनेपछि हामीले नेपाली कम्युनिष्ट पार्टी किन नभन्ने ?’
अनि चम्किलो तारालाई चुनाव चिन्ह राखिएको बताए । ‘तारा चम्किलो चिन्ह किन नलिने । वृहत छलफलपछि हामी यो दुईवटा निष्कर्षमा पुगेका हौं,’ उनले भने । उनले देशविरोधी, संविधानविरोधीसँग कुनै सम्झौता नगर्ने बताए । ‘हामी प्रतिगमनको दिशामा लैजाने प्रयत्नलाई विफल बनाउनेछौं,’ उनले भने । सरकारसँग वार्तामा रहेका जेनजीहरूलाई पनि पार्टीमा भित्र्याएको बताउँदै उनले अन्य जेनजीहरूलाई पनि यो पार्टीमा आबद्ध हुन आह्वान गरे ।
नेपालले नयाँ पार्टी घोषणाले नेपाली राजनीतिमा तरंग पैदा गरेको बताउँदै नेपाली जनताको आशा र भरोसाको केन्द्र यो पार्टी बन्ने बताए । उनले यो पार्टीमा आफूहरूको अग्नी परीक्षा पनि सुरू भएको बताए । ‘जनतालाई हामीले विश्वास दिलाउनु पर्छ । यो पुरानै पार्टीको स्वरुप होइन । आफ्नै पार्टीहरूमा रहेका कमी कमजोरीको समीक्षा गरेर, गल्ती सुधार गरेर, परिवर्तनको संबाहक बनेर, क्रान्तिकारी चरित्र बोकेका योद्धाहरूको पार्टी बनाएका छौं,’ उनले भने ।
उनले सुशीला कार्की नेतृत्वको सरकारलाई सहयोग गर्नुपर्ने आवश्यकता रहेको औंल्याउँदै निष्पक्षरूपमा चुनाव हुनुपर्ने बताए । उनले बिहान मात्रै आफूले जेनजीको वार्तामा रहेकालाई पार्टीमा भित्र्याएको सुनाए । अरुलाई पनि पार्टीमा आउन आग्रह गरे, ‘आउनुस् हामीसँग हातेमालो गर्दै अघि बढ्नुहोस् । सुशासनको पक्षमा होस्, भष्ट्राचारको विरुद्धको अभियानमा होस् । जनताको जीवनमा रुपान्तरणको कुरामा होस् ।’ समाजमा रहेका विकृति, विसंगतिविरुद्ध जुध्ने कुरामा हात मिलाएर अघि बढ्न तयार रहेको बताए । सामाजिक अभियन्तालाई हातेमालो गरेर अघि बढ्न तयार रहेको बताए ।