काठमाडौँ । नेपाली कम्युनिष्ट पार्टी (नेकपा) ले आज (आइतबार) गण्डकी प्रदेशलाई लक्षित गरेर कास्कीको पोखरामा एकता सन्देश सभा गर्दैछ । पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपाललगायतका नेताले सभामा सम्बोधन गर्ने कार्यक्रम छ ।

नेकपाले भोलि (सोमबार) कोशीको विराटनगरमा, मंसिर १८ गते, कर्णालीको सुर्खेतमा, २० गते मधेशको जनकपुरमा र २३ गते बागमतीको हेटौँडामा सभा गर्ने तालिका सार्वजनिक गरेको छ । मंसिर २९ गते देशभरका पालिकामा एकता सन्देश सभाको तयारी नेकपाको छ ।

यसअघि नेकपाले शनिबार लुम्बिनी प्रदेशको दाङ देउखुरीमा र शुक्रबार सुदूरपश्चिमको धनगढीमा एकता सन्देश सभा गरेर प्रदेशस्तरमा पार्टीको सन्देश प्रवाह गरेको छ । नेकपाका नेताहरुले जेनजी आन्दोलनले १५ बाम घटक दललाई एकत्रित गराउन बल दिएको बताउँदै आउँदा दिनमा आफूहरु सच्चिन तयार रहेकाले आत्मालोचनाका लागि जनता समक्ष आइरहेको बताइरहेका छन् ।