काठमाडौँ । नेपाली कम्युनिष्ट पार्टी (नेकपा) ले आज धनगढीमा सन्देश सभा गर्दैछ । नेपाली कम्युनिष्ट पार्टी गठनपछि पहिलो पटक प्रदेशस्तरीय सन्देश सभा लिएर पार्टी काठमाडौँ बाहिर जान लागेको हो । सभामा पार्टीका संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाल, नेता भीम रावललगायतले सम्बोधन गर्ने कार्यक्रम छ । पार्टीले लुम्बिनीको देउखुरीमा मंसिर १३ गते, गण्डकीको पोखरामा मंसिर १४ गते, कोशीको विराटनगरमा मंसिर १५ गते सभा गर्नेछ ।

साथै कर्णालीको सुर्खेतमा मंसिर १८ गते, मधेशको जनकपुरमा मंसिर २० गते र बागमतीको हेटौँडामा मंसिर २३ गते सभाको तयारी गरेको छ । हिजो आयोजित पार्टी एकता कार्यक्रममा नेकपामा सहसंयोजक माधव नेपालले धनगढीमा २० हजार बढी मानिस कार्यक्रममा उतार्ने दावी गरेका थिए ।