काठमाडौं । नेपाली कम्युनिष्ट पार्टी (नेकपा) का सह–संयोजक माधवकुमार नेपालले पार्टीप्रति युवाको भरोसा बढ्दै गएको बताउँदै हालसम्म हजारौं युवा संगठनमा प्रवेश गरिसकेको दावी गरेका छन् ।

मधेश प्रदेशस्तरीय एकता सन्देश सभामा बोल्दै उनले भ्रष्टाचारको अन्त्य र सुशासन स्थापना गर्न नेकपा अग्रसर रहेको उल्लेख गरे । उनले नयाँ पुस्ताले उठाएका मागहरू, विशेष गरी जेनजी आन्दोलनले अघि सारेका मुद्दा, न्यायोचित भएको र पार्टीले त्यसलाई अग्रस्थानमा राखेर अघि बढाउने प्रतिबद्धता जाहेर गरे । सभामा अन्य नेकपा नेताहरूले समेत पार्टीलाई सबल र विश्वासिलो विकल्पका रूपमा उभ्याउन एकताबद्ध प्रयास जारी रहेको बताए ।

मुलुकमा देखिएका विभिन्न बेथिति, दुरुपयोग र कमजोर शासन व्यवस्थाले जनतामा निराशा बढाएको उल्लेख गर्दै नेताहरूले नेकपा त्यसको विकल्पका रूपमा अघि बढिरहेको धारणा राखे । पार्टी एकताको सन्देश व्यापक रूपमा प्रसारण गर्ने उद्देश्यले नेकपाले विभिन्न प्रदेशमा सन्देश सभा सञ्चालन गरिरहेको छ । यसै क्रममा अब कर्णाली र काठमाडौंमा पनि विशाल एकता सन्देश सभाको तयारी भइरहेको पार्टीले जनाएको छ ।