काठमाडौं । नेकपा एमालेको ११ औं महाधिवेशनबाट नयाँ नेतृत्व चयनका लागि आज बिहान ८ बजेदेखि मतदान प्रक्रिया सुरु भएको छ । काठमाडौंको भृकुटीमण्डपमा जारी महाधिवेशनमा सहभागी प्रतिनिधिहरू मतदानका लागि बिहानैदेखि लाइनमा उभिन थालेका छन् ।

यसअघि प्राविधिक तयारी नपुगेको भन्दै पटक–पटक सरेको मतदान अन्ततः तय समयमै सुरु भएको हो । केन्द्रीय सदस्यका उम्मेदवार तथा वर्तमान स्थायी कमिटी सदस्य शेरबहादुर तामाङका अनुसार सबै प्राविधिक तयारी राति नै पूरा भएकाले मतदान समय सार्नुपर्ने अवस्था रहेन । उनका अनुसार विद्युतीय भोटिङ मेशिनमार्फत मतदान हुँदैछ ।

भृकुटीमण्डपको मुख्य हल बुधबारका लागि अन्य प्रयोजनमा बुक भएकाले मतदानस्थल भने परिवर्तन गरिएको छ। महाधिवेशनको बन्द सत्र भएको स्थानमै मतदानको व्यवस्था मिलाइएको हो। एमालेका लागि २ हजार २६२ जना प्रतिनिधि छनोट भइसकेका छन्, जसले आज मतदानमा भाग लिँदै छन्।

यस पटक एमालेले ८० वटा विद्युतीय भोटिङ मेसिन प्रयोग गरेको छ। रामलक्ष्मण इनोभेसन प्रालिले निर्माण गरेको उक्त मेसिन अघिल्ला महाधिवेशनमा जस्तै यसपटक पनि प्रयोगमा ल्याइएको हो। कम्पनीका प्राविधिक लक्ष्मण रिमालका अनुसार सबै उपकरणमा डाटा इन्ट्री सम्पन्न भइसकेको छ र मतदानका लागि तयारी अवस्थामा राखिएको छ। मतदान गर्न एक जना मतदातालाई करिब ३५ देखि ४० मिनेट समय लाग्ने अनुमान गरिएको छ। मतदान सकिएलगत्तै मतगणना सुरु हुने र करिब दुई घन्टाभित्र परिणाम सार्वजनिक हुने जनाइएको छ।

महाधिवेशनबाट ३०१ सदस्यीय केन्द्रीय कमिटी चयन हुँदैछ। पदाधिकारीतर्फ अध्यक्ष १, उपाध्यक्ष ५, महासचिव १, उपमहासचिव ३ र ९ जना सचिव निर्वाचित हुनेछन्। नेतृत्वका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल आ–आफ्नो प्यानलसहित चुनावी मैदानमा उत्रिएका छन्।

पाँच जना उपाध्यक्षका लागि अरूण नेपाल, गुरूप्रसाद बराल, गोकर्ण विष्ट, टंकप्रसाद कार्की, परशुराम मेघी गुरूङ, पृथ्वीसुब्बा गुरूङ, भीमप्रसाद आचार्य, रघुजी पन्त, रामबहादुर थापा ‘बादल’, डा. विन्दा पाण्डे र विष्णु पौडेल उम्मेदवार छन्। महासचिव पदमा शंकर पोखरेल र सुरेन्द्रप्रसाद पाण्डेबीच प्रतिस्पर्धा भइरहेको छ।
त्यस्तै उपमहासचिवका तीन पदका लागि आनन्दप्रसाद पोखरेल, योगेश भट्टराई, रघुवीर महासेठ, राजेन्द्रप्रसाद गौतम, लेखराज भट्ट, विष्णु रिमाल र वैजनाथ चौधरी उम्मेदवार बनेका छन्।

सचिवका नौ पदका लागि अग्निप्रसाद खरेल, इन्द्रलाल सापकोटा, कर्णबहादुर थापा, कृष्णगोपाल श्रेष्ठ, खगराज अधिकारी, गोकुलप्रसाद बास्कोटा, छविलाल विश्वकर्मा, ठाकुर गैरे, पद्माकुमारी अर्याल, पुरुषोत्तम पौडेल, पेम्बा लामा, भानुभक्त ढकाल, महेश बस्नेत, यामलाल कँडेल, रचना खड्का, राजन भट्टराई, लालबाबु पण्डित, विनोद ढकाल, शेरधन राई र हिक्मतकुमार कार्की प्रतिस्पर्धामा छन्। एमालेको ११औँ महाधिवेशनबाट आउने नयाँ नेतृत्वले आगामी राजनीतिक दिशा तय गर्ने भएकाले आजको मतदानलाई चासोका साथ हेरिएको छ।