काठमाडौं । पूर्वराजा ज्ञानेन्द्र शाहले राजतन्त्र पछाडि देशले सामना गर्नुपरेको अवस्थाले चिन्तित तुल्याएको बताएका छन् । राष्ट्रिय एकता दिवसको पूर्व सन्ध्यामा शनिबार भिडियो सन्देशमार्फत उनले अहिले देश नै नबच्ने हो कि भन्ने निराशा पैदा भएको बताएका हुन् ।

‘हिजो देश नबनेकोमा चिन्ता थियो, आज देश नै नबच्ने हो कि भन्ने निराशा पैदा भएको छ,’ उनले भिडियो सन्देशमा भनेका छन् । शान्ति र आर्थिक प्रगतितर्फ देशलाई लैजाने दलहरूको चाहनाअनुसार राजतन्त्र जनतामा सुरक्षित गर्दै श्रीपेच त्यागेको उनले बताएका छन् ।

‘झण्डै दुई दशक अघि शान्ति ल्याउँछौं, आर्थिक प्रगतितर्फ देशलाई लैजान्छौं र स्थायित्व दिन्छौं भनेर सत्तामा पुगेका दलहरूको चाहनाअनुसार श्रीपेच र राजतन्त्र जनताको नासो जनताकै संरक्षणमा बुझाएका हौं,’ उनले भनेका छन् ।