काठमाडौं । नेपाली कांग्रेसका नेता सुनिल शर्माले पार्टी सभापति शेरबहादुर देउवाले पार्टीलाई कब्जामा लिएको आरोप लगाएका छन्।

कांग्रेसको दोस्रो विशेष महाधिवेशनको उद्घाटन सत्रलाई सम्बोधन गर्दै शर्माले पार्टीभित्र लोकतान्त्रिक मूल्य–मान्यता कमजोर हुँदै गएको दाबी गरे। उनले कांग्रेसको विचारधारा मध्यमार्गी भएको उल्लेख गर्दै त्यसबाट विचलन भइरहेको आरोप लगाए।

सभापति देउवाप्रति कटाक्ष गर्दै शर्माले भने, ‘शेरबहादुर दाइ, तपाईंलाई माथिबाट बोलाइरहेको बेला पार्टीमा रोइलो नमच्चाउनुस्।’ उनले नेतृत्व प्रतिस्पर्धाबाट भाग्न नहुने भन्दै महाधिवेशनमा खुला प्रतिस्पर्धाको आह्वान गरे।

‘भोलि बिहान हल उद्घाटन गर्न आउनुस्,’ शर्माले भने ‘आउनुस् प्रतिस्पर्धा गरौं। जसले हारे पनि लोकतन्त्रले हार्नु हुँदैन ।’

उनले पार्टी नेतृत्वका लागि आफूहरू पाँच विकल्प लिएर तयार रहेको उल्लेख गर्दै पार्टीलाई लोकतान्त्रिक प्रक्रियामार्फत अगाडि बढाउनुपर्नेमा जोड दिए।