नेपाली काँग्रेसका प्रवक्ता देवराज चालिसेले पार्टीको गौरवपूर्ण इतिहास र भरपर्दो भविष्य सँगसँगै लिएर निर्वाचनमा होमिने बताएका छन् ।

शुक्रबार काठमाडौंमा आयोजित एक कार्यक्रममा बोल्दै उनले यस्तो बताएका हुन् । चालिसेले पार्टीको नीति र शैली पूर्ण रुपमा परिवर्तन भइसकेको उल्लेख गर्दै नयाँ जोशका साथ मुलुकको निर्माणमा लाग्ने बताए ।  उनले भने, ‘अहिले काँग्रेस बद्लिसकेको छ । यसको सोच, शैली र सबै प्रक्रिया नै फेरिएको छ । युवाहरुमा नयाँ जोश आएको छ । काँग्रेस बदलिएको मात्र होइन । नयाँ  अठोट र नीतिका साथ काँग्रेस आएको छ ।’

कांग्रेसको गौरवपूर्ण इतिहास रहेकाे बताउँदै अहिले नयाँ भिजन लिएर चुनावमा गएकाे बताए। अबको काँग्रेसले यो बीचमा अल्मलिएको अवस्थामा रहेको काँग्रेसको विरासतलाई नबोक्ने उनको जिकिर छ ।  ‘बीचको काँग्रेसको विरासत हामी बोक्दैनौँ, जुन अल्मलिएको अवस्थामा थियो । अब हामी नवीनता बोकेर आएका छौँ । सुध्रिएर आएका छौँ । बिचको विरासतको जवाफदेही हामी छैनौँ । त्यो बिर्सन चाहान्छौँ, अब त्यसको पुनरावृत्ति हुदैन । २००७ सालमा वीपीले दिएको योगदानसँग अबको काँग्रेस जोड्न चाहन्छौँ ।’

अब पार्टीलाई हरेक वर्ग र समूदायको बनाएर यही भावका साथ अघि बढ्ने चालिसेको जिकिर छ ।