काठमाडौं । प्रधानमन्त्री सुशीला कार्कीले आगामी प्रतिनिधिसभा निर्वाचन शान्तिपूर्ण ढंगले सम्पन्न गर्न सरकार सम्पूर्ण रूपमा तयार रहेको बताएकी छिन् ।

नेपाल प्रहरीको निरीक्षकहरूको दीक्षान्त समारोहलाई सम्बोधन गर्दै प्रधानमन्त्री कार्कीले निर्वाचनलाई स्वतन्त्र, निष्पक्ष र विश्वसनीय बनाउनु सरकारको दायित्व भएको पनि बताइन् ।

उनले निर्वाचनमा एक थोपा रगत बग्न नहुने र कोही पनि घाइते हुन नहुने भन्दै त्यसतर्फ प्रहरीको ध्यान जानुपर्नेमा जोड दिएकी छिन् ।

‘यो चुनाव नेपाली लोकतन्त्रको उदाहरणीय मानक बन्नुपर्छ,’ उनले भनिन्, ‘चुनावमा एक थोपा पनि रगत बग्नु हुँदैन । एक जना पनि घाइते हुनु हुँदैन ।’

उनले कर्तव्य पालनका सिलसिलामा प्रहरीले गरेका सबै व्यावसायिक क्रियाको जिम्मा सरकारले लिने बताइन् ।

प्रहरीको शक्ति हतियार होइन, कानुनमा हुने र नाडीमा होइन आचरणमा हुने भन्नै प्रहरीलाई अनुशासित र कानुन पालनामा आदर्शवान संस्था बन्न सुझाइन् ।
उनले आगामी निर्वाचनलाई लोकतन्तको कोशेढुङ्गा बनाउन चाहेको पनि बताएकी छन् ।

‘आसन्न फागुन २१ गतेको निर्वाचन हाम्रो उत्तरदायी लोकतान्त्रिक यात्राको एक कोशेढुङ्गा हो । स्वतन्त्र, निष्पक्ष र विश्वसनीय वातावरणमा निर्वाचन सुनिश्चित गर्नु राज्यको दायित्व हो,’ उनले भनिन्, ‘जसमा नेपाल प्रहरीको भूमिका अत्यन्तै संवेदनशील र निर्णायक हुन्छ । यस सन्दर्भमा म तपाईंहरूलाई आग्रह गर्दछु, राजनीतिक प्रभाव, दबाब र पूर्वाग्रहबाट माथि उठेर संगठनको मर्मअनुसार आफ्नो जिम्मेवारी निर्वाह गर्नुहोस् । तपाईंहरूको निष्पक्षता नै लोकतन्त्रको सुरक्षा हो ।’

प्रधानमन्त्री कार्कीले प्रहरीलाई विगतका कमजोर नदोहोर्‍याउन र थप विश्वसनीय सुरक्षा संगठनको रूपमा स्थापित हुन आग्रह गरिन् ।