काठमाडौं । पूर्वको प्रशिद्ध धार्मिक केन्द्र ताप्लेजुङको पाथीभरा मन्दिर पुगेर प्रधानमन्त्री सुशीला कार्कीले शान्तिपूर्ण निर्वाचनको कामना गरेकी छन् ।

स्थानीय लिम्बू समुदायले मुकुम्लुङसमेत भनिने पाथीभरा मन्दिरको दर्शन र पूजाआजापछि उनले आगामी २१ फागुनको निर्वाचन शान्तिपूर्ण सम्पन्न होस् भन्ने कामना गरिन् ।

दर्शनपछि कार्कीले सामाजिक सञ्जालमा लेखेकी छन्, ‘फागुन महिना, निर्वाचन महिना । पाथीभराबाट शुरूवात । शान्तिपूर्ण निर्वाचनका लागि कामना गरेकी छु ।’

हिमाली जिल्लाहरूको अनुगमनको क्रममा रहेकी प्रधानमन्त्री कार्की सोलुखुम्बुबाट ताप्लेजुङ पुगेकी हुन् ।

उनले त्यहाँका प्रमुख जिल्ला अधिकारी, मुख्य निर्वाचन अधिकृत र सुरक्षा निकायसँगै दलका प्रमुखहरूसँग निर्वाचन तयारीबारे आजै जानकारी लिने भएकी छन् ।

२१ फागुनमा हिमाली जिल्लाहरूमा निर्वाचन नहुने हो कि भन्ने संशय छँदा प्रधानमन्त्री कार्की ती जिल्लाहरूको स्थलगत अवलोकनमा निस्किएकी हुन् ।