काठमाडौं। १२ वर्षपछि टी-२० विश्कप खेलमा जित निकाल्ने क्रममा अर्धशतकीय पारी खेलेका दिपेन्द्र सिंह ऐरी प्लेयर अफ द म्याच बनेका छन् ।

खेल सकिएपछि जितबारे प्रतिक्रिया दिँदै उनले मुम्बईसम्म पुगेर खेलाडीको हौसला बढाउने समर्थकहरूलाई धन्यवाद दिए र आजको जितले आत्मविश्वास बढेको बताए ।

उनले भने, ‘सबैभन्दा पहिले म फ्यानहरूलाई धन्यवाद दिन चाहन्छु । मुम्बईमा आएर साथ दिनुभयो । त्यसले हाम्रो आत्मविश्वास बढेको छ । पछिल्लो विश्वकपमा हामीले जित्न नसकेपनि यो विश्वकपमा जित्न सक्यौं । खुशी छु ।’

आफ्नो अर्धशतकिय पारीले जितलाई सहज बनाएको उनले बताए । ‘२३ बलमा अर्धशतक भनेको राम्रो हो,आज राम्रो गर्न सकेँ,’ ऐरीले भने, ‘यस्तै खालको चेजले हाम्रो आत्मविश्वास बढाउँछ । मैले धेरै डटबल खेल्दिनँ । सिंगलडबल लिन्छु र गलत बलमा बाउन्ड्री हान्छु ।’