काठमाडौं । टी–२० विश्वकप क्रिकेटको सुपर-८ चरणमा पुग्ने आठ टोलीको टुंगो लागेको छ ।

समूह चरणका केही खेल बाँकी रहँदै सुपर-८ मा भारत, पाकिस्तान, श्रीलंका, जिम्बावे, वेस्ट इन्डिज, इंग्ल्याण्ड, दक्षिण अफ्रिका र न्युजिल्याण्ड प्रवेश गरेका छन् ।

समूह ‘ए’ बाट भारत र पाकिस्तान उत्कृष्ट प्रदर्शन गर्दै अघिल्लो चरण पुगे । अमेरिका, नेदरल्याण्ड्स र नामिबिया भने बाहिरिए ।

समूह ‘बी’ मा श्रीलंका र जिम्बावेले स्थान सुरक्षित गर्दा आयरल्याण्ड, अस्ट्रेलिया र ओमानको यात्रा समूह चरणमै टुंगियो । अस्ट्रेलियाको अप्रत्याशित बहिर्गमन यस संस्करणको ठूलो उलटफेर मानिएको छ ।

नेपाल सहभागी रहेको समूह ‘सी’ बाट वेस्ट इन्डिज र इंग्ल्याण्ड अघि बढे भने नेपाल, इटाली र स्कटल्यान्ड बाहिरिए । समूह ‘डी’ बाट दक्षिण अफ्रिका र न्युजिल्याण्डले सुपर-८ मा स्थान बनाउँदा अफगानिस्तान, यूएई र क्यानडा प्रतियोगिताबाट बाहिरिए ।

सुपर-८ का खेल शनिबारदेखि सुरु हुनेछन् । समूह–१ मा भारत, दक्षिण अफ्रिका, वेस्ट इन्डिज र जिम्बावे छन् भने समूह-२ मा इंग्ल्याण्ड, न्युजिल्याण्ड, पाकिस्तान र श्रीलंका प्रतिस्पर्धामा उत्रनेछन् ।

प्रत्येक टोलीले समूहभित्र एक–अर्कासँग खेल्नेछ र शीर्ष दुई टोली सेमिफाइनलमा पुग्नेछन् ।