दमक । नेकपा एमालेका उपमहासचिव योगेश भट्टराईले आगामी निर्वाचनमा एमाले र अध्यक्ष केपी शर्मा ओलीले हारे देशले नै हार भोग्नुपर्ने बताएका छन् ।

ओलीकाे चुनाव क्षेत्र झापा–५ काे कमल गाउँपालिकामा आइतबार आयोजित मोटरसाईकल र्‍यालीको उद्घाटनमा उनले आगामी निर्वाचनबाट राष्ट्रवादी शक्तिलाई विजयी गराउन आग्रह गरे ।

अहिले राष्ट्रवादी शक्तिको नेतृत्व एमालेले गरिरहेको र एमालेको नेतृत्व केपी शर्मा ओलीले गरेकाले एमाले र ओलीको जित जरुरी रहेको भट्टराईले बताए ।

झापाले नेपाली कम्युनिष्ट आन्दोनलाई पुनर्जीवन दिएको उल्लेख गर्दै उपमहासचिव भट्टराईले झापाले राष्ट्रवादी शक्तिलाई निर्वाचित गराई देशव्यापी सन्देश दिनेमा आफू ढुक्क रहेको बताए ।

झापा क्षेत्र- ५ अन्तर्गतको कमल गाउँपालिका वडा नं. ७ को गेउरीयामा आयोजित सभामा उनले यस क्षेत्रमा भएको विकासको मोडल देशकै लागि नमूना रहेको समेत दाबी गरे ।

उपमहासचिव भट्टराई पूर्वप्रधानमन्त्री एवम् पार्टी अध्यक्ष ओलीलाई जिताउने चुनावी अभियानका क्रममा यस क्षेत्रका विभिन्न कार्यक्रममा सहभागी भएका छन् ।