काठमाडौं । आइसिसि पुरुष टी-२० विश्वकपको पहिलो सेमिफाइनल खेलमा  न्युजिल्यान्डले टस जितेर दक्षिण अफ्रिकालाई ब्याटिङको निम्तो दिएको छ ।

कोलकाताको ईडेन गार्डेनमा सुरू हुन लागेको सेमिफाइनलको बिजेताको प्रतिस्पर्धा फाइनलमा भारत वा इंग्ल्यान्डसँग हुनेछ ।

यो सेमिफाइनल दुई भिन्न यात्राको जम्काभेट हो, दक्षिण अफ्रिका निर्मम र अपराजित तथा न्युजिल्यान्ड असंगत तर खतरनाक देखिएको छ । टी-२० विश्वकपमा दक्षिण अफ्रिकाले न्युजिल्यान्डविरुद्ध पाँचै खेलमा जित हासिल गरेको छ । एकपटक पनि हार भोगेको छैन । तर, नकआउट चरणमा भने दुई टोली पहिलोपटक भिड्दैछन् ।

दक्षिण अफ्रिकाले सन् २०२४ को टी-२० विश्वकप फाइनलमा भारतविरुद्ध हृदयविदारक पराजय व्यहोरेको थियो । ३० बलमा ३० रन चाहिँदा एकपछि अर्को विकेट गुमाएर सात रनले हार भएको थियो । त्यो पराजयको पीडा अझै ताजा छ र यस पटक उनीहरू त्यो दाग मेटाउन आएका छन् ।

दक्षिण अफ्रिका टोलीले ग्रुप चरणमा चारवटा र सुपर ८ मा थप तीनवटा खेल जितेर यो विश्वकपको एकमात्र अपराजित टोलीको रूपमा सेमिफाइनलमा प्रवेश गरेको छ । कप्तान तथा ब्याट्समान दुवै भूमिकामा उत्कृष्ट प्रदर्शन गर्दै आइडेन मार्कारम यस विश्वकपमा सबैभन्दा विस्फोटक ब्याट्समानका रूपमा देखिएका छन् ।  समूह चरणमा न्युजिल्यान्डविरुद्ध उनको ४४ बलमा अपराजित ८६ रनको पारी विशेष रूपमा उल्लेखनीय छ । थप ३२ रन थपेमा मार्कारम एउटै टी-२० विश्वकपमा ३०० रन पुर्‍याउने छैठौं ब्याट्समान बन्नेछन् ।

न्युजिल्यान्डको यात्रा भने थप कठिन रही । उनीहरू यस विश्वकपमा दुई पराजय व्यहोरे- दक्षिण अफ्रिका र इंग्ल्यान्डसँग । र, नेट रन रेटका आधारमा पाकिस्तानलाई उछिनेर सेमिफाइनल प्रवेश गर्न सफल भए । तर, नकआउट क्रिकेटमा यी कमजोरीहरूले कति महत्त्व राख्छन् भन्ने प्रश्न उठ्छ । न्युजिल्यान्डका कप्तान मिचेल सान्टनरले भने, “हामीले यो प्रतियोगितामा अझसम्म उत्कृष्ट खेल देखाएका छैनौं, यो हाम्रा लागि राम्रो कुरा हो ।”

न्युजिल्यान्डका लागि फिन एलेन र टिम साइफर्टको सुरुवाती जोडी निर्णायक हुनसक्छ। साइफर्टले यस विश्वकपमा १५७.६६ को स्ट्राइक रेटमा २१६ रन संकलन गरिसकेका छन् । भने म्याट हेन्री दोस्रो सन्तानको जन्मका लागि स्वदेश फर्किएका थिए र खेल अघि मात्र भारत पुग्नेछन्, उनको उपलब्धतामा अझै अनिश्चितता छ ।

खेल बुधबार साँझ कोलकातामा हुनेछ, पिचको गाढा रंगले सैद्धान्तिक रूपमा स्पिनलाई केही मद्दत गर्नसक्छ — तर दुवै कप्तान टस जित्दा ब्याट गर्ने कि फिल्डिङ गर्ने भन्नेमा स्पष्ट जवाफ दिन चाहेनन् । साँझमा थोरै शिशिरको सम्भावना रहेकाले टस निर्णायक बन्नसक्छ र चेजिङ टोलीले फाइदा उठाउनसक्छ ।

दक्षिण अफ्रिकाका कप्तान मार्कारमले भने, “ग्रुप चरणको जित यहाँ काम लाग्दैन, यो बिल्कुलै नयाँ सुरुवात हो — सेमिफाइनल भएकाले झनै रोमाञ्चक छ ।” अर्कातिर सान्टनरले भने, “हामीलाई अन्डरडग भन्छन् कि छैनन् भन्नेसँग सरोकार छैन — एकल खेलमा हामी जोसँग पनि प्रतिस्पर्धा गर्नसक्छौं ।”