काठमाडौं । घन्टी चुनाव चिह्नमा मत दिने नेताहरूलाई पार्टीबाटै हटाउनेगरी कारबाही गर्ने चेतावनी नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले दिएका छन् ।

चुनावी नतिजाप्रति असन्तुष्ट प्रचण्डले आफ्नै पार्टीका उम्मेदवारलाई भन्दा पनि रास्वपाका घण्टी चिह्नबाहक उम्मेदवारहरूलाई मत दिने सबै नेताको विवरण मागेका छन् ।

उनले त्यसरी बदमासी गर्ने केन्द्रीय सदस्य, प्रदेश सदस्यहरूलाई कारबाही गर्नैपर्ने र यदि नगरिए पार्टी नबन्ने बताए ।

पार्टीमा अन्तरघात डरलाग्दोगरी भएको भन्दै चिन्ता प्रकट गरेका छन् । उनले प्रारम्भिक विवरणअनुसार ५० प्रतिशत नेता कार्यकर्ताहरू घण्टी अर्थात् रास्वपामा गएको जानकारी आएको बताए ।

उनले त्यसरी घण्टीमा जानेलाई आँखा चिम्लेर कारबाही गर्ने चेतावनी दिएका छन् ।

प्रचण्डको दल नेपाली कम्युनिस्ट पार्टी प्रतिनिसभामा १७ सिटसहित चौँथो दलीय हैसियतमा छ ।

२०६४ को संविधानसभा निर्वाचनमा भने प्रचण्डको त्यसबेलाको दल नेकपा माओवादी पहिलो दल बनेको थियो ।

२०७० मा तेस्रो, २०७४ मा एमाले र माओवादी मिल्दा पहिलो र २०७९ मा तेस्रो दल बनेको थियो ।

यसपटक झन् खिइँदै चौथो दल बन्दा प्रचण्डले पार्टी नेता भन्ने तर भोट अर्कै दलका उम्मेदवारलाई दिन नेताहरूमाथि कारबाहीको डण्डा चलाउने भएका हुन् ।