काठमाडाैं। नेपाली काँग्रेसका अधिकांश केन्द्रिय सदस्यहरुले पार्टी सभापति गगनकुमार थापाले दिएको राजीनामा स्वीकृत गर्न नहुने धारणा राखेका छन् । पार्टी केन्द्रिय कार्यसमितिको जारी पार्टी बैठकमा उपसभापति विश्वप्रकाश शर्माले सभापतिको राजीनामा अस्वीकृत गर्ने प्रस्ताव पेश गरेका हुन् ।

बैठकमा बोल्ने बहुमत सदस्यहरुले नैतिकताको आधारमा दिएको राजीनामाको उच्च सम्मान गर्दै अस्वीकृत गर्नुपर्ने धारणा राखेको पार्टी प्रवक्ता देवराज चालिसेले जानकारी दिएका हुन् । प्रवक्ता चालिसेकाअनुसार अधिकांश सदस्यहरुले देशको पछिल्लो परिस्थिति र पार्टी पुननिर्माणका लागि थापाको नेतृत्व आवश्यक रहेको बताएका छन् । अहिलेको समय परिस्थिति सम्हाल्न तथा पार्टीलाई थप जिम्मेवारीका साथ अघि बढाउने बेला उनको भनाइ छ ।

‘देशको परिस्थिति र पार्टीलाई नवजीवन दिनुपर्ने, पार्टीलाई पुनःनिर्माण गर्नुपर्ने र आधुनिकीकरण गरेर फेरी जनताले अपेक्षा गरेअनुसारकै काँग्रेस पार्टी बनाउने दायित्व यो समितिमा छ । यो समितिले नै १५ महाधिवेशन पनि सम्पन्न गर्नुपर्ने छ । यो सबै परिस्थितिमा उहाँले नैतिकताको आधारमा दिएको राजीनामालाई हामीले उच्च मूल्याङ्कन गर्दै त्यसलाई अस्वीकार गर्ने प्रस्ताव पनि छ’ चालिसेले बताए।

सभापति थापाले उपसभापति विश्वप्रकाश शर्मालाई बुझाएको राजीनामाको विषयमा बैठकमा छलफल भइरहेको छ । जारी बैठकले हालै सम्पन्न प्रतिनिधि सभा निर्वाचनबाट आएको जनमतलाई स्वीकार्ने निर्णय गरेको पनि प्रवक्ता चालिसेले जानकारी दिए ।