काठमाडौं । १९ औँ संस्करणको जारी इन्डियन प्रिमियर लिग (आइपीएल) अन्तर्गत आज दुई खेल हुँदैछन्।

आइतबारको पहिलो खेलमा सनराइजर्स हैदरावाद र लखनउ सुपर जाइन्ट्सबीच प्रतिस्पर्धा हुनेछ। राजीव गान्धी अन्तर्राष्ट्रिय क्रिकेट रंगशालामा हुने उक्त खेल नेपाली समयअनुसार दिउँसो ३:४५ बजेदेखि सुरु हुनेछ।

हालसम्म सनराइजर्स हैदरावादले २ खेल खेल्दा एकमा जित र एकमा हार बेहोरेको छ। उसले पहिलो खेलमा रोयल च्यालेन्जर्स बैंगलुरुसँग हार व्यहोरेको थियो भने दोस्रो खेलमा कोलकाता नाइट राइडर्सलाई पराजित गरेको थियो। उता लखनउ सुपर जाइन्ट्स भने आफ्नो पहिलो खेलमा दिल्ली क्यापिटल्ससँग पराजित भएको थियो।

त्यसैगरी, आजको दोस्रो खेलमा रोयल च्यालेन्जर्स बैंगलुरु र चेन्नई सुपर किंग्स आमनेसामने हुनेछन्। बैंगलुरुमा हुने यो खेल नेपाली समयअनुसार साँझ ७:४५ बजेदेखि सुरु हुनेछ।

रोयल च्यालेन्जर्स बैंगलुरुले आफ्नो पहिलो खेलमा सनराइजर्स हैदरावादलाई पराजित गरेको थियो भने चेन्नई सुपर किंग्सले हालसम्म खेलेका दुवै खेलमा हार बेहोरेको छ।