काठमाडौं । प्रधानमन्त्री कप एकदिवसीय क्रिकेट प्रतियोगितामा सुदूरपश्चिम प्रदेशले वागमती प्रदेशसामु २१० रनको लक्ष्य प्रस्तुत गरेको छ।

जनकपुरस्थित रामजानकी बहुउद्देश्यीय रंगशालामा जारी खेलमा पहिले ब्याटिङ गरेको सुदूरपश्चिम ४२.१ ओभरमा २०९ रनमै समेटिएको हो।

सुदूरपश्चिमका लागि नारायण जोशीले उत्कृष्ट अर्धशतकीय पारी खेले। उनले ६८ बलमा २ चौका र ६ छक्का प्रहार गर्दै ७५ रन बनाए। त्यस्तै दीपक बोहराले ४०, अभिषेक पालले ३९ र अशोक धामीले १७ रन जोडे। अन्य खेलाडीले भने दोहोरो अंकमा रन बनाउन सकेनन्।

वागमतीका लागि कप्तान सन्दीप लामिछाने र प्रतिस जिसीले समान ४-४ विकेट लिए। त्यस्तै, सोनु देवकोटा र रिजन ढकालले एक एक विकेट लिए।

यसअघि टस जितेर वागमती प्रदेशले पहिले फिल्डिङ रोजेको थियो।