काठमाडौँ । राष्ट्रिय स्वतन्त्र पार्टीबाट निर्वाचित सांसद मनिष झाले सदन यसपटकबाट खुमलटार, बालकोट र बुढानीलकण्ठको प्रभावबाट मुक्त भएको बताएका छन्। सोमबार प्रतिनिधिसभाको बैठकमा बोल्दै उनले सभामुखलाई लोकतन्त्र बलियो हुने गरी काम गर्न सुझाव दिँदै यस्तो धारणा व्यक्त गरेका हुन्।

सांसद झाले विगतमा सदन खुमलटार, बालुवाटार, बुढानीलकण्ठ र बालकोटको प्रभावमा सीमित हुँदा सिद्धान्तभन्दा संख्या हाबी भएको टिप्पणी गरे। अब सदनलाई सिद्धान्तमा आधारित बनाउने समय आएको उनको भनाइ थियो। ‘सदन कुनै चिया पसल होइन, जहाँ आएर जथाभावी बोलिन्छ,’ उनले भने।

उनका अनुसार सदन विद्यालय र विश्वविद्यालयजस्तो हुनुपर्नेछ, जहाँ सांसदहरू तयारीसहित उपस्थित भई जनताका प्रश्न उठाउनुपर्छ। उनले जनमतको अस्तित्व कमजोर भए संसदबाट जनता नै टाढा हुने चेतावनी दिए।

झाले वर्तमान संसदलाई नयाँ सुरुआतको रूपमा चित्रण गर्दै सबै दलको सहयोगप्रति आभार व्यक्त गरे। आन्दोलन र बलिदानबाट आएको परिवर्तनलाई संस्थागत गर्दै दक्षिण एसियाकै उत्कृष्ट संसद बनाउने लक्ष्य रहेको उनले बताए।

उनले विगतमा शक्तिकेन्द्रहरूको प्रभावका कारण सदन कमजोर बनेको उल्लेख गर्दै अब सबैलाई योगदान गर्न आग्रह गरे। साथै, जनताका मुद्दा उठाउन अध्ययन र तयारी आवश्यक रहेको बताउँदै जनमतको सम्मान गर्न सबैलाई आह्वान गरे।